Trat via na ucajion

Hockey/Jëuni - Chëst ann à i pitli dla Under 10 dl HC Gherdëina bele scumencià ai prims de agost a jì sun dlacia a fé i alenamënc y perchël ne aspitovi nia l’ëura de pudëi fé l prim turnoi.

Under 10
N sada ai 17.10. fòvela pona tan inant. Tl stadio dala dlacia Pranives de Sëlva iel unit adalerch la scuadres de Persenon, Renon y doves dl Bulsan. I pitli messova jughé contra uni scuadra un n tëmp che durova 12 menuc. Chëst ann iel unit leprò mo na nuvità, ntan che cater scuadres s’la jugova, messova la cuinta scuadra fé n percurs cun rëms y chësc se purvan a l fé plu asvelc che ie mesun. Chësc fova scialdi blòt, sibe ai mutons che a duc chëi che ie unic a cialé pro ti à plajù chësta nuvità. Per la scuadra dl HC Gherdëina àl fat i goi Jonas Kostner (2), Erik Kantioler y Aaron Oberbacher.

U16 Val de Flëm - Gherdëina 5:6 (1:1, 2:1, 2:4)
Na bela partida cumbatuda ie stata chëla dla Under 16 n dumënia ai 18 de utober tla Val de Flëm. Kevin Senoner à sapù da mutivé i mutons y se à udù ora che l verdiaporta di autri ne fova nia iust l miëur y nsci àl fat tré scialdi i mutons sun cassa. La partida fova valiva y do l 4:4 ie l Gherdëina stat bon de jì danora sun l 6:4 y mé doi menuc dan la fin à l Fiemme mo fat n gol, ma la vënta ne fova nia plu da ti tò ai jugadëures dl Gherdëina. I mutons à dat l 100% nchin ala fin y canche duc dà dut pona tënien nce pea cun l’autra scuadres. Trëi ponc meritei per l Gherdëina, bravi mutons! Per l Gherdëina àl fat 2 goi prun Tobias Fill y Marc Frisch, un n gol prun à fat Tim Linder y Nicolas Demetz.

U18 Fascia - Gherdëina 6:5 (2:0, 1:2, 3:3)
Na partida riesc da desmincë y da cialé inant fova chëla dla Under 18 n sada ai 17 de utober via n Fascia. I mutons ne à nia jugà coche i sà da jughé y uniun jugova mé per sé nstës. La va de se dé na scasseda, ajache jugan nscila ne ruveràn nia lonc. Per l Gherdëina àl fat i goi Diego Glück (2), Leo Holzknecht, Damian Bergmeister y Marcel Comploi.

U20 Cortina - Gherdëina 2:1 (1:0, 0:0, 1:1)
Na bela partida cumbatuda fova chëla de n dumënia a Cortina da pert dla Under 20. Purtruep l’ài pertuda, ma se giapan massa menuc de straufonga y trajan massa puech sun cassa di averseres ne pòssen nia vëncer. Speron che la bute inò l proscimo iede. L gol per l Gherdëina ie unì fat da Patrick Major.

La proscima partides di jëuni n cësa:
Duman sada ai 24.10. dala 14.30 jugherà la U14 contra l Bulsan Junior y dala 17.30 fajerà la U18 contra l Neumarkt.