Venciù contra i campions dal ann passà

(im) Per doi scuadres di jëuni dl Hockey Club Gherdëina à bele scumencià l campiunat. La Under 20 vënc a Sterzing ntan che si cumpanies plu jëuni dla Under 16 muessa ti la dé vënta al Neumarkt

U16 Neumarkt - Gherdëina 11:1 (4:0, 3:1, 4:0)
La scuadra dla Under 16 à n dumënia ai 20 de setëmber fat si prim juech de campiuat a Neumarkt. Aldò dl resultat pudëssen miné che i mutons dl Gherdëina ne à nia jugà drë’ bën, ma davia che i fova scialdi mëndri che i autri y belau duc dla Under 14 – pra l Gherdëina iel mé doi jugadëures de 15 ani – ne se ài nianca no batù tan mel. N vëija che i mutons à ueia de fé hockey y n vëija nce che ntan l instà iel unì laurà dassënn. Na gran lauda ti va ai verdiaporta che à datrai fat marueies per ne se giapé nia mo plu goi. Da muië fova l solito problem cun i arbitradëures che fova propi ”da se daudé”, i ne se capiva nianca no danter ëi.
Sambën che l resultat ne n’ie nia tan bel, 11 a 1 per l Neumarkt! Ma sce i se proa inant coche n dumënia pona pòssela mé jì suvier. Per l Gherdëina à Marc Frisch fat l gol.

U20 Sterzing - Gherdëina 3:4 d.p. (1:1, 1:1, 1:1, 0:1)
Nce la scuadra dla Under 20 à fat si prima partida y chësta fova n dumënia ai 20 de setëmber a Sterzing. Contra i campions taliani dal ann passà, de chëi che trueps juega chëst ann tla scuadra de serie A, se à l Gherdëina astilà scialdi bën, jugan na bela partida cumbatuda y valiva. Nce tlo iel da dì che la prestazion di arbitradëures fova n pitl spavënt, i ne sciblova nia y la ie unida tan inant che un n jugadëur dl Gherdëina àn messù mené te spedel a se lascé cujì y nce n auter à messù unì curà dal dutor do n fal dl Sterzing. La partida ie fineda via tl tëmp reguler per 3:3 y nsci àn messù jì al ”overtime” y pona ai penalties. Iló l’à trata ca l Gherdëina y à venciù cun merit la prima partida de campiunat. I goi per l Gherdëina ie unic fac da Juri Runggaldier (2), Damian Bergmeister tl tëmp reguler. L penalty dezijif fova de Leo Holzknecht.

La proscima partides n cësa:
La U18 juega n sada ai 26.9. dala 16.30 contra l Renon. La U20 fej n dumënia ai 27.9. dala 15.00 contra l Valpellice. (im)