N bel turnoi dla Under 11

N dumënia ai 30 de jené 2022 ova i mutons dla U11 n turnoi n cësa tl stadio Pranives. Plu avisa se tratòvel dl prim turnoi che univa jugà sun duta la dlacia. Coche da regulamënt à la Under 11 nchin Nadel for mé jugà sun mesa la plaza dala dlacia.

U11

La scuadres averseres fova l HC Lana y l Junior Teams Auer/Neumarkt. Te chësc cajo vëniel jugà doi tëmps da 15 menuc contra uni scuadra, cun na pitla pausa danterite. La prima partida fossa stata contra l HC Lana, ma davia che chësta scuadra ne fova mo nia ruveda, à l HC Gherdëina jugà n iede contra l Junior Teams. I nosc à abù n pez a ruvé ite tl juech, i fova mpue melsegures davia che canche n juega sun duta la dlacia ie plu aspec per ëi nueves da cunscidré, per ejëmpl che n ne daussa nia passé via la linia bruma dan l cumpani che à la scipa (oradejuech - Abseits), o l baraté ora jugadëures che muessa jì scialdi debota y n adrova na gran cunzentrazion.

I ie stac boni de tré nce n valgun iedesc sun cassa, ma la scipa ne ulova nia jì ite. L prim juech ie nscila finà via 0:6 per l Junior Teams. Pra l segondo juech udòven che i se ova bele mpue usà y n muessa dì che i à jugà drët bën, purempò ne ulova la scipa nia passé via l verdiaporta di averseres. La partida ie nsci fineda via 2:9 for per l Junior Teams. Do chësc juech à nosc mutons pudù paussé, ajache l fova śën l Lana che jugova contra l Junior Teams (1:3 y 1:2). L'ultima partida per i pitli dl Gherdëina fova pona contra l HC Lana y nosc mutons à jugà drët bën ne i lascian nia drë passé via la rissa bruma. L juech fova nscila scialdi dan la cassa di averseres y n à udù n beliscimo juech de scuadra. L Gherdëina à nsci venciù l prim tëmp 2:1 y l segondo tëmp 7:2 cun goi de Alex Pasquali, Ben Mayr (3), Diego Pezzei (4), Mattia Saturno (2) y David Pezzei.

U13

La scuadra Under 13 de Gherdëina à jugà te si campiunat n sada ai 29 de jené n cësa contra l Renon, che i nosc à batù per 9:2. N mierculdi ai 2 de fauré (canche la redazion ova bele stlut, ndr.) ài mo jugà contra l Persenon/Wipptal. Repurteron l resultat l iede che vën.

U17

I jugadëures sot a 17 ani de Gherdëina juega deberieda cun la scuadra dl Renon y tla partida de n sada ai 29 de jené ài batù i Aosta Gladiators per 2:0 cun i tëmps jic ora 1:0 1:0 0:0. Tramedoi goi ie unii fai da Alex Oberrauch.

Fonte: La Usc di Ladins