Venciù y perdù sëch

U19

Kaltern – Gherdëina/Renon 3:2

La partida de n dumënia a Kaltern à l Gherdëina/Renon purtruep perdù, nce sce la fova bëndebò valiva y aldò che l ie unì trat sun cassa, 28 contra 43 iedesc, à i nosc monce drucà deplù. Dantaldut tl terzo tëmp canche i à valivà ora bele tl scumenciamënt, ma pona iel inò stat i averseres a jì danora y ala fin àn mo purvà a tò ora l verdiaporta, ma purtruep ne à chësc juà nia. I doi goi ie unii fai da Alex Oberrauch sun assist de Tommy Delucca. Chësta dumënia, ai 24 de utober, jugherà la U19 n cësa dala 17:30 contra l Asiago.

U17

Milano Bears – Renon/Gherdëina 0:13

Partida zënza gran storia chëla dla sada passeda tl Palagorà de Milan, ulache l Renon/Gherdëina ie unit a frida a tré 55 iedesc sun la cassa aversera, ntant che l Milan à mé trat ot iedesc. L Renon/Gherdëina à venciù saurì cun i tëmps jic ora 0:5, 0:3, 0:5. La Under 17 jugherà inò duman sada sun Renon contra l Pinerolo.

U15

Gherdëina – Renon 3:10

N dumënia ai 17 de utober à la U15 abù si partida de campiunat n cësa. Tl scumenciamënt ie nosc jugadëures mo stac boni te tenì pea cun l juech dl Renon, che ie na scuadra scialdi sterscia. Purtruep fova la doi scuadres scialdi desvalives davia che l Renon à n valgun de bon jugadëures che fej nce bele cun la U17. L trainadëur dl Renon lasciova jughé scialdi chisc y nsci ne n'ie i nosc, ulache l ie nce truep pitli jugadëures dla U13 leprò, nia stai boni de ruvé ite tl juech, se giapan truep goi. Ala fin à la scuadra messù ti la zeder per 3:10. I goi per l HC Gherdëina ie unii fai da Jannik Kasslatter (2) y Leo Moroder (1). La proscima partida sarà n dumënia ai 24 de utober a Alleghe. Speron che i sibe boni de purté a cësa n bon resultat y ti mbincion dut l bon per chësc juech.

U13

Gherdëina – Foxes Academy 5:12

N sada ai 16 de utober à la U13 jugà n cësa contra la scuadra di Foxes Academy de Bulsan, ulache i à perdù plutosc sëch. Speron che la vede miec tla proscima partida, che sarà duman sada oradecà contra l Toblach.

Fonte: Usc di Ladins