La U9 à inò dat gas

N sada ai 10 de fauré 2019 dala 11.00 ova la scuadra U9 n turnoi n cësa tl stadio Pranives de Sëlva. L fova l 10° y terzultimo turnoi de chësc campiunat. Contra l HC Gherdëina se batova chëst iede l HC Alta Badia, l HC Vinschgau Warriors y l HC Toblach. Ntan che l HC Vinschgau jugova contra l HC Alta Badia se batova nosc mutons contra l HC Toblach. I fova da stramp boni sun dlacia y à trat truep iedesc sun cassa, purempò ti iel garatà ai averseres de fé un n goal deplù che i nosc. La partida ie nsci jita ora 5:4 per l Toblach. I trainadëures fova da stramp cuntënc cun l rendimënt di mutons, n muessa nce dì che l à fat pea bën cin’ jugadëures nueves y nsci fova la terza linia metuda adum mé da chisc pitli che à scumencià da permò. L segondo juech fova contra l HC Vinschgau y nce tlo se à i nosc purvà dassënn, vencian nsci chësta partida per 2:1. L terzo juech fova pona mo contra l HC Alta Badia. I mutons fova mo plëns de energia y ulova a duc i cosć vëncer nce chësc juech. Bel mpont ti iela jita fata de vëncer chëst’ultima partida cun l resultat de 3:1. L publicum fova ntujiast y sambën nce i mutons, che dala legrëza trajova manëces y peles plu lonc, se abracian duc y fajan na gran festa. Rengrazion duc chëi che à judà pea a fé garaté chësc blòt turnoi. La proscima partida per la U9 sarà n sada ai 23 de fauré a Toblach.

U19 Fiemme - Gherdëina 4:2 (2:0; 0:0; 2:2)
N dumënia ie la U19 furneda a Ciavaleis cun na scuadra de mé diesc jugadëures plu doi verdiaporta. Na situazion nia nueva te chësta sajon y che porta cun sé na straufonga per l HC Gherdëina. Ma i mutons che à jugà la partida se à purvà dassënn y à fat dla dutes per tré decà chësta partida, tulan nce mo ora l verdiaporta sun la fin, metan ite n jugadëur deplù sun dlacia, ma la ne à nia ulù vester. Per l Gherdëina àl fat i goi: Marc Frisch y Julian Senoner.