L gran mpëni à purtà a de bon resultac

Se purvan dassënn à la scuadres di jëuni dl HC Gherdëina fat de bela partides, mé per la U13 iel stat na pitla desfata.

Under 11
Per la U11 fòvel n dumënia dl’ena passeda ai 9 de dezëmber n turnoi n cësa tl stadio Pranives de Sëlva. I pitli dl Gherdëina à jugà contra la scuadres de Lana y de Maran. Da fé fòvel for doi partides da 15 menuc l’una contra uni averser. Nosc mutons y nosta mutans ie piei via cun n gran sgors, desmustran na gran ueia y ulentà. La ti ie nce jita fata chëst iede y i à valivà ora una y à venciù l’autra partida contra l Lana. Cun l Maran se ài tl prim stentà mpue deplù y à messù ti la zeder tla prima partida. Tla segonda partida se ài purvà dassënn y ëssa belau venciù, ma tl ultimo menut à chëi de Maran mo valivà ora, tulan ora si verdiaporta y metan ite n jugadëur deplù. Purempò iel da ti dì n gran “bravo“ ala scuadra dla U11, che se à propi purvà dassënn. L proscimo juech arài n dumënia ai 23 de dezëmber a Lana.

U13 Persenon - Gherdëina 19:2 (3:1; 7:1; 9:0)
La U13 à n sada ai 8 de dezëmber jugà a Persenon contra la scuadra di HC Falcons Brixen y l ie stat na pitla desfata. Tl prim tëmp ne cialòvela niancanó ora tan stleta y l juech fova scialdi muvimentà. Nce i prim doi goi, un per pert a na destanza de mé 15 secunc un dal auter, à lascià unì su speranzes per n bon resultat. Tl segondo tëmp à la scuadra di averseres cumbatù scialdi deplù y nosc mutons ne fova nia plu drë’ boni de ti sté do. Tl terzo tëmp nes à la scuadra de Persenon mo dat l “colp de grazia“ tichenan doi de nosc jugadëures y vencian ala fin per 19:2. Per l Gherdëina àl fat i goi: Nicolas Andriolo y Niklas Piccolruaz.

U15 Alleghe - Gherdëina 2:5 (1:3, 0:1, 0:1)
N l di de San Miculau à la U15 jugà a Alleghe. La partida à scumencià mustran riesc che nosc mutons se purvova y fova nce scialdi miëures di averseres. Tl prim tëmp à nosta scuadra fat i prim trëi goi, l prim ie bele tumà do 50 secunc de juech. Cun i goi tumei tl segondo y terzo tëmp à nosc jugadëures purtà nosta scuadra dalonc dal Alleghe y per ëi ne fòvel plu nia da n fé. L Gherdëina à trat 62 iedesc sun cassa y l ie da dì che l verdiaporta dl Alleghe ie stat veramënter bon, al incontra à l Alleghe mé trat sies iedesc sun cassa. I mutons dl Gherdëina à fat na bela partida y se à purtà a cësa trëi ponc, ruvan nsci inant al terzo post dla tlassifica de si “girone“ y for plu daujin ala fasa naziunela. Per l Gherdëina à Ruben Prinoth fat doi goi y un n gol Ben Linder, Marc Kasslatter y Tommy Delucca.

Chësta fin dl’ena ne n’à i jëuni dl HC Gherdëina deguna partides n cësa.