Vel’ partida vënta y vel’autra piersa

La U11 à n dumënia ai 11 de nuvëmber, di de San Martin, fat si terzo turnoi de chësta sajon, chëst iede a Kaltern. I jugadëures à fat doi partides da 15 menuc contra la scuadra dl Kaltern y la scuadra dl Bulsan. Scumencià à i mutons dl Gherdëina mpue ndurmenzei, ma pona se ài descedà ora, desmustran na gran ueia, ulentà y de vester valives cun l’autra scuadres. Nsci iesi nce stai boni de finé via a pèr doi partides y doves n ài perdù mé de puech. L proscimo turnoi unirà fat n cësa, tl stadio Pranives de Sëlva, n dumënia ai 25 de nuvëmber dala 2 domesdì. Unide duc a fé n bel tifo a chisc pitli jugadëures.

U13 Gherdëina - Bulsan Foxes Academy 1:17 (0:4, 0:8, 1:5)
La U13 à n sada ai 10 de nuvëmber jugà n cësa la sesta partida dl campiunat contra la scuadra sterscia dl Bulsan Foxes Academy White. Bele danora savòven che la ne fossa nia stata saurida a fé vel’ gol y nscila à i mutons cialà dantaldut de paré ju. Do l prim tëmp stajòvela bele 0:4 per l Bulsan y nce tl segondo tëmp ne fova nosc mutons nia boni de fé vel’ gol. Tl terzo tëmp, puech dan la fin dla partida, iel pona tumà l prim y sëul gol dl Gherdëina cun na beliscima azion de Alan Schwingshackl sun assist de Niklas Piccolruaz. L resultat finel fova de 1:17. Nce sce na tel desfata ne n’ie mei bela, fova i mutons mpo mo cuntënc de ti avëi fat almanco un n gol ala bona scuadra dl Bulsan.

U17 Gherdëina - Valpellice 6:5 (5:1, 0:3, 1:1)
La U17 à jugà n dumënia ai 11 de nuvëmber n cësa contra l Valpe. Tl prim tëmp ài jugà scialdi bën, tant che i ie jic danora per 5:1, tl segondo tëmp se ài pona bonamënter mpensà che la va saurì, ma la ne fova nia nsci y lascian pro true’ de massa al Valpe, ie chisc pona stac boni de purté l resultat sun l 5:4. Tl terzo tëmp fova i jugadëures dl Gherdëina inò plu cunzentrei y ne se à nia plu lascià tò chësta vënta, vencian per 6:5.
Per l Gherdëina àl fat i goi: Leo Messner (2), Nicholas Paratoni, Leo Rabanser, Anton Perathoner y Tobias Moroder.

Proscima partides di jëuni n cësa:
La U13 jugherà duman sada ai 17.11. dala 14.00 contra l Cortina. La U15 jugherà n dumënia ai 18.11. dala 14.00 contra l Bulsan Academy.