Doi iedesc se l’àn fata ora ai penalties

Tan che duta la scuadres jëunes dl HC Gherdëina à jugà ntan l ultim fin dl’ena. Tlo i resultac

U9: I pitli dla Under 9 à fat n sada ai 6 de utober si prim turnoi. I ie furnei a Eppan per jughé cun trëi scuadres. Ti prim doi juesc contra l Eppan y l Bulsan Academy Foxes à nosc pitli jugà scialdi bën y cun gran mpëni, se giapan mé puec goi, ma dal’autra pert ne ulova la scipa nia ti jì ite te cassa y nsci ài perdù tramedoi juesc. Tla terza partida fovi bëndebò stanc y purtruep ài perdù nce l terzo juech. Per nosc pitli ne n’iel nia stat saurì, ajache i fova de diesc jugadëures y trëi de chisc à fat si prim turnoi de 4 contra 4, nsci ne n‘ovi nia gran dl’aurela danter un n “cambio“ y l auter per pudëi se paussé ora. L ti va na gran lauda, ajache i se à purvà dassënn y à dat dut. N gra ti va nce al trainadëur Jori Kokkonen, ai acumpaniadëures y a duc i genitores che à sustenì nosc pitli. L proscimo turnoi per la Under 9 sarà n sada ai 20.10.2018 a Neumarkt.

U13 Gherdëina – Pustertal 3:21
Tla partida de n sada ai 6 de utober contra la scuadra sterscia de Puster ne fòvel nia da n fé per i nosc. Sun la fin dl segondo tëmp, canche i pustri à fat l gol dl 10 a 2, se à nosc verdiaporta Arik Planker fat mel y à messù ora. Mpede ël iel jit ite n jugadëur, Alexander Canazei. A d’ël ti vàl na lauda, ajache l ne n’ie pa nia tan saurì a sté te cassa a se lascé tré ados, canche n ne ie nia usei a fé chësc lëur. Sambën se à pustri fat saurì tl terzo tëmp a fé goi, nsci che l resultat ie ala fin sautà ora bëndebò aut. I goi per l Gherdëina ie unii fai da Nicolas Andriolo (2) y Alan Schwingshackl.

U15 Bulsan Academy - Gherdëina 6:3 (2:1, 2:0, 2:2)
Prima partida de campiunat per la U15 n dumënia ai 7 de utober tla Sill. L fova n drë nibl, che n ne udova nia da una na pert al’autra y la dlacia fova bëndebò lutra y da nëif nsci che la scipa ne sbrisciova nia, ma mpo à i mutons dl HC Gherdëina jugà na bona partida, cumbatan nchin ala fin. Dantaldut tl terzo tëmp ài, do che i fova per 1:5 dovia, dat dut y l ti ie garatà doi goi ruvan plu daujin ai averseres. Purempò fova la stanchëza massa granda per ti vester al Bulsan, che ova scialdi plu jugadëures che no l Gherdëina. Nce l verdiaporta à fat n bon lëur.
Per l Gherdëina àl fat i goi: Marc Kasslatter (2) y Tommy Delucca.

U17 Valpellice - Gherdëina 4:3 d.p. (2:0, 1:1, 0:2, 0:0, 1:0)
La scuadra dla U17 à n sada ai 6 de utober fat l viac lonch nchin a Valpellice per jughé si partida de campiunat. L ie stat na partida scialdi cumbatuda nchin ala fin. Do che l Gherdëina fova dovia per 1:3, iesi tl terzo tëmp mo stai boni de valivé ora l resultat, jan nsci tl "overtime", ulache l ne ie tumà degun gol. Perchël messòven s’la fé ora cun i penalties. Nce iló scialdi valives, iel stat debujën de bën nuef tiri per pert per finé la partida. Venciù à l Valpellice, ma l Gherdëina à mpo fat na bona partida.
Per l Gherdëina àl fat i goi: Tommy Delucca, Nicholas Paratoni y Leo Messner.

U19 Gherdëina - Pustertal 3:2 d.p. (1:1, 0:1, 1:0, 0:0, 1:0)
Nce la partida dla U19 de n dumënia ai 7 de utober ie fineda cun i penalties, ma per fertuna cun na bela vënta contra i pustri. Na vënta de marueia, sce n pënsa che al Gherdëina ti manciòvel bën trëi jugadëures y chël ie scialdi, ajache la scuadra ie bele zënza pitla. I mutons à desmustrà che tl hockey ne daussen mei la dé su y do che i fova 1:2 dovia, iesi stai boni puech dan la fin dla partida de valivé ora. Canche tl "overtime" ne n’iel pona tumà degun gol, se à l Gherdëina fat gran speranza, davia che l verdiaporta Leo Kostner à bele da for desmustrà na bona prestazion pra i penalties. Nsci iela nce stata y l Gherdëina à venciù chësta partida scialdi sentida.
Per l Gherdëina àl fat i goi: Julian Senoner, Leo Messner y l gol dezijif fova de Tobias Moroder. (im)