La U19 vënc si prima partida

Ntan che i majeri ie bele pra si terza partida à l campiunat per la U13 permò scumencià

U13 Gherdëina – Renon Junior 2:5 (1:1;0:2;1:2).
N sada ai 22 de setëmber à i mutons dla Under 13 jugà si prima partida dl campiunat nuef 2018/19 contra la scuadra dl HC Renon Junior. Te chësta categuria vel bele duta la regules coche pra i granc y i juega nce trëi tëmps da 20 menuc. Nscila iel unit a s’l dé che i mutons à jugà drët bën tl prim tëmp fajan monce l prim gol dla partida bele do n valgun menuc. Sambën ne à i jugadëures dl Renon nia aspità giut a dé na resposta y nsci stajòvela 1:1 do l prim tëmp. Purtruep à i nosc tl segondo tëmp perdù mpue la cunzentrazion y à messù ti la zeder a chëi dl Renon che à fat mo doi goi. Tl terzo tëmp fòvel danz rie a tré ite i trëi goi de defrënza, ma un n gol ie nosc mutons mo stac boni de fé. Nce sce i à perdù iel mpo stat n gran suzes per chësta bela scuadra te si furmazion nueva. Bravi mutons! I goi ie unii fai da Kevin Senoner y da Alan Schwingshackl.

U17 Asiago - Gherdëina 7:2 (2:0, 4:1,1:1)
N sada ie i mutons dla Under 17 furnei a Asiago a fé si partida de campiunat. Sciot per chësta partida, ulache i arbitradëures à sciblà scialdi melamënter y l Gherdëina à messù jughé scialdi mé de cater o monce de trëi contra cinch. Ma nce i mutons ne à nia iust jugà la miëura partida n sada y nsci ài perdù plutosc sëch per 2:7. Per l Gherdëina àl fat i goi: Tobias Fill y Tobias Moroder.

U19 Fiemme - Gherdëina 2:5 (0:0, 1:3, 1:2) 
Do avëi perdù la prima doi partides, vënc la Under 19 la partida de n dumënia ai 23 de setëmber contra la scuadra dla Val de Flëm. L Gherdëina à jugà bën y cun disciplina, l prim tëmp ie jit ora 0:0, da dedò fova l Gherdëina dovia de n gol, ma i mutons à cumbatù dassënn se meritan de vëncer. Da auzé ora ie l verdiaporta Leo Kostner che à inò desmustrà si savëi y si calma, ti dajan nsci segurëza ala scuadra. Per l Gherdëina àl fat i goi: Kevin Schmalzl, Lucas Glück, Julian Senoner, Tim Linder y Nicolas Demetz. (im)