Doi menuc dan la fin venciòven mo

Ultima partides de campiunat per i jëuni dl HC Gherdëina y turnoi Hermann Senoner per scuadres U11

U13 Gherdëina - Sterzing 5:6 (1:0, 1:1, 3:4, 0:0, 0:1)
N sada ai 17 de merz à la U13 fat si ultima partida de campiunat. N à scumencià bën y i mutons ulova sambën finé via la sajon vencian l'ultima partida. L prim tëmp ie jit ora 1:0 per i nosc, tl segondo tëmp fova tramedoi scuadres bëndebò valives y l ie jit ora per 1:1. Danter l segondo y terzo tëmp à pona l capitan dl Gherdëina dit a si cumpanies de dé mo l 200% y de ne dé nia do nianca n secunt. Tl terzo tëmp fòvel pona bëndebò da sté ert, ajache do uni gol de una na scuadra, n fajova l'autra riesc lessù mo un. Nchin a doi menuc dan la fin stajòvela 5:4 per i nosc, ma l Sterzing à mo fat n gol y n à messù jì ai penalties. Pra i penalties ne sons purtruep nia stai boni de fé n gol y nsci à l Sterzing venciù la partida. I mutons dl Gherdëina fova mpo cuntënc dla partida y dl mpëni ntan duta la sajon. Per l Gherdëina àl fat i goi: Matthias Perathoner (3), Nicolas Hofer y Maximilian Moroder.
 
U15 Kaltern - Gherdëina 11:4 (2:3, 4:1, 5:0)
La scuadra dla U15 à n dumënia fat la prima partida dla finela dla Copa dl Trivenet, ulache la prima dla grupa A, l Kaltern, se la fajova ora cun la prima dla grupa B, l Gherdëina. L ie unì jugà a Kaltern y n muessa dì che la ne à nia massa butà. Scumencià àla mo drët bën y l Gherdëina ie do 7 menuc jit danora per 3:1. Ma pona iela jita dojù y ala fin ài purtruep perdù sëch per 4:11. Speron che la bute deplù tla partida de ëuta. Per l Gherdëina àl fat 2 goi prun Leo Messner y Ben Linder.

Partides di jëuni n cësa
Per la Under 11 iel ala fin de chëst’ena sun l program l turnoi n lecort de Hermann Senoner, che ie ruvà a si 12ejima edizion. Ntëur n 90 jugadëures nasciui tl 2007 y plu jëuni dla scuadres dl HC Gherdëina, Bulsan Junior, Bulsan Academy, dl SV Sterzing y dl HC Fiemme se musererà n sada y dumënia ai 24 y ai 25 de merz te chësc turnoi. L program vëija dant chësta partides:

• n sada dala 10.00 Gherdëina - Sterzing, dala 11.00 Academy - Fiemme, dala 12.15 Bulsan Junior - Academy, dala 14.00 Sterzing - Fiemme, dala 15.00 Gherdëina - Academy, dala 16.00 Bulsan Junior - Fiemme;
• n dumënia dala 9.00 Gherdëina - Bulsan Junior, dala 10.00 Sterzing - Academy, dala 11.15 Gherdëina - Fiemme, dala 12.15 Sterzing - Bulsan Junior; dala 14.00 saràl la finela.

La umans da tlo fajerà coche for la tëurtes per na "bona man" per la scuadra U11. Unide duc tl stadio Pranives a fé n bel tifo.
Ora dl turnoi Hermann Senoner vëniel mo jugà n cësa l'ultima partida de campiunat dla scuadra U15 n lunesc ai 26 de merz dala 18.00 contra l Kaltern. (im)