I majeri de l HCG vënc sëch

Under 9
N dumënia ai 25 de fauré à la U9 fat si ultim turnoi de chësta sajon 2017/18. I mutons ie furnei a Maran a fé trëi partides. Si averseres fova l Bulsan, l Toblach y l Maran. Ntan la partides contra l Bulsan y l Maran ài jugà scialdi bën, ma ala fin purtruep perdù de puech. L Toblach fova massa stersc per i nosc coche nce bele pra l ultim turnoi. Rengrazion de cuer i acumpaniadëures per dut si mpëni y cruzi ntan chësta sajon y nce i genitores che à judà y che à sustenì i mutons unian pea a fé tifo.

Under 11
N dumënia ai 25 de fauré ie i mutons dla U11 furnei a Lana tla Gaulschlucht per jughé l ultim turnoi de plazamënt dl campiunat, jugan contra la scuadres dl HC Bulsan Foxes Junior B y dl HC Lana Young Lions. La ti à butà dassënn y nscila iesi stai boni de purté a cësa bën 5 ponc cun 2 partides venciudes, 1 partida fineda via a pèr y una partida perduda, arjunjan ala fin l 15ejim post tla tlassifica. Chisc i resultac: HC Gherdëina contra HC Bulsan 1:0 (gol de Jonas Piccolruaz) y 1:1 (gol de Alan Schwingshackl). HC Gherdëina contra HC Lana 1:2 (gol de Gabriel Turina) y 2:1 (goi de Jonas Kostner y Alan Schwingshackl).

U13 Sterzing - Gherdëina 5:3 (1:1, 2:2, 2:0)
Per l Gherdëina àl fat i goi: Julian Kostner (2) y Niklas Piccolruaz.

U15 Gherdëina - Persenon 3:2 (0:0, 1:0, 2:2)
N dumënia ai 25 de fauré à la U15 jugà n cësa contra l Persenon. L Gherdëina à jugà bën, fova scialdi dan cassa di autri trajan mo n tan de iedesc sun cassa che l averser, ma la scipa ne ulova nia drë jì ite. Ala fin àla mpo mo butà y l Gherdëina à venciù per 3:2. Per l Gherdëina àl fat i goi: Leo Rabanser, Marc Kasslatter y Davide Macaluso.

U17 Gherdëina - Aosta 11:3 (5:3, 4:0, 2:0)
La scuadra dla U17 à jugà n sada ai 24 de fauré contra l Aosta. Coche n vëija dal resultat ài venciù saurì jugan bëndebò bën y bel deberieda y nce l verdiaporta à jugà scialdi bën. Per l Gherdëina àl fat i goi: Tobias Moroder (2), Julian Senoner (2), Leo Messner, Kevin Schmalzl, Gabriel Stenico, Anton Perathoner, Marc Kasslatter, Giordan Insam y Lukas Glück.

U19 Gherdëina - Milan 16:2 (3:1, 4:1, 9:0)
La scuadra dla U19 à jugà n dumënia ai 25 de fauré contra l Milan. Coche la scuadra dla U17 à nce la U19 venciù sëch. Inò trëi ponc mpurtanc per ruvé daujin ai playoff. Śën saràl mo da fé l'ultima doi partides, una ncuei vënderdi a Kaltern y l’autra n dumënia ai 4 de merz a Maran. Speron che la ti buta. Per l Gherdëina àl fat i goi: Damian Bergmeister (5), Andreas Vinatzer (3), Florian Moroder (2), Nicolas Demetz, Tobias Moroder, Kevin Schmalzl, Giordan Insam, Marc Frisch y David Pescosta. (im)

FOTO: Ntan na partida dla Under 9, cun si lores portafertuna sun cassa.