Turnoies per i plu jëuni

Drët cuntënc iesen de coche la ie jita ti turnoies U9 y U11. Mpue manco butà ti àla al’autra scuadres che à jugà chëst’ena, nce sce i se à batù drët bën

La Under 9 à fat pea n sada ai 18 de nuvëmber pra n turnoi a Auer. Chëst iede ài messù jughé contra l WSV Sterzing, l HC Pustertal, l HC Leifers y l HC Neumarkt/Auer. La prima partida contra l Leifers à butà dassënn y l Gherdëina à venciù per 4 a 1. L’autra trëi partides ài perdù mé de puech, ma jugan scialdi bën y fajan de gran vares inant. Do l turnoi à i mutons mo pudù jì a se maië zeche de bon acumpaniei dal trainadëur Gabriel y dal acumpaniadëur Maurizio, finan via nsci duc adum n blòt di n cumpania. Rengrazion nce chëi genitores che fova pea y che à judà dut ntëurite.

La Under 11 à n dumënia ai 19 de nuvëmber fat pea pra l cuinto turnoi dla sajon. Coche nce bele pra i turnoies passei, valova nce chëst iede uni tëmp coche singula partida. Chëst iede ti àla drët butà ai mutons y i se à davanià 4 de biei ponc. Ntan la partides contra l Lana Young Lions y l HC Maran Junior ài pudù purvé ora cumbinazions defrëntes de juech, mudan unitant linia y unitant pusizion de juech. Duc se à purvà dassënn y à fat de bela partides. Chisc i resultac:
HC Gherdëina contra Lana Young Lions 1:1; 2:4. Goi de Leo Moroder (3); HC Gherdëina contra HC Maran Junior 4:1; 1:3. Goi de Leo Moroder (2), Gabriel Turina, Alexander Canazei, Jonas Piccolruaz.

U13 Gherdëina - Persenon 2:10 (1:2, 0:3, 1:5)
N sada ai 18 de nuvëmber à la scuadra dla Under 13 jugà n cësa contra l Persenon. La partida à perdrët scumencià scialdi bën per i jugadëures dl Gherdëina y do mé doi menuc y mez iesi jic danora cun l prim gol. Finà via ie pona l prim tëmp per 2:1 per l Persenon y tl segondo tëmp iel purtruep tumà mo trëi goi per l averser. Ala scuadra dl Gherdëina ne ti manciòvel segurdenó la ucajions de fé goi, ma la scipa ne ulova nia jì ite. Nce tl terzo tëmp ne à nosc mutons nia dat do, ma l Persenon fova danz plu sterch y à venciù per 10:2. L Gherdëina ie śën cuarto te tlassifica. I doi goi per l Gherdëina ie unii fai da Nikolas Hofer.

U15 Gherdëina - Bulsan Foxes 7:6 (2:2, 4:1, 1:3)
La partida dla Under 15 n dumënia ai 19 de nuvëmber contra la scuadra dl Bulsan Foxes ie stata bëndebò valiva. Nce sce i mutons dl Gherdëina à trat scialdi plu sun cassa che i averseres, jan for danora de n gol o doi, ie i autri ruvei for daujin y nchin ala fin dla partida fòvel da sté ert, ma per fertuna iela jita fata y i mutons à venciù cun merit chësta partida per 7:6. Per l Gherdëina àl fat i goi: Leo Messner (3), Ben Linder (2), Leo Rabanser y Marc Kasslatter.

U19 Gherdëina - Renon 3:5 (1:0, 2:2, 0:3)
Sciot per chësta partida dla Under 19 che ie stata n mierculdi ai 15 de nuvëmber te Sëlva. I mutons dl Gherdëina à fat na bona partida, jan danora doi iedesc y i fova sun la bona streda de vëncer. Purtruep se àn pona giapà tl terzo tëmp do mé 46 secunc l gol che valivova ora l resultat y riesc do mo un, nsci che da dedò ne ti garatòvel plu nia y ala fin ài perdù la partida per 3:5. Per l Gherdëina àl fat i goi: Tobias Moroder, Damian Bergmeister y Nicolas Demetz.

U19 Eppan - Gherdëina 2:1 d.p. (1:0, 0:1, 0:0, 0:0, 1:0)
Partida scialdi cumbatuda nchin ala fin chëla dla Under 19 n dumënia ai 19 de nuvëmber a Eppan. Nce sce l Gherdëina ova plu ucajions da gol che l averser y se à purvà dassënn, ne ti iela nia jita fata y n à messù jì al "overtime" y pona a tré i penalties, ulache l Gherdëina à pona perdù.
L gol per l Gherdëina fova de Nicolas Demetz.

La proscima partides di jëuni n cësa: sada ai 25.11. dala 14.00 juega la U19 contra l Puster. (im)