Duc à venciù

Se purvan y se tulan a cuer i nseniamënc dl trainadëur àn fat de bela partides chëst’ena passeda

Nosc pitli dla Under 9 dl Gherdëina ova n sada ai 11 de nuvëmber da fé n turnoi a Corvara, che fej pert dla prima raida dl campiunat. Iló ovi sciche averseres l WSV Sterzing, l HC Maran Blue y l HC Alta Badia. N à tlo inò udù i fruc dl bon lëur che i trainadëures Larry Sadler y Gabriel Lang fej cun nosc mutons. Un n juech ài venciù saurì y i autri ài perdù de puech. Chisc resultac ti dà na gran ueia ai mutons per i proscimi turnoies. L proscimo sarà bele duman sada ai 18.11. a Auer.

U13 Toblach - Gherdëina 2:4 (0:2, 2:1, 0:1)
Nosc mutons y nosta muta (Alessia Glira) dla Under 13 ie ruvei sun dlacia n mierculdi ai 8 de nuvëmber bele bëndebò ciariei y segures de si capaziteies. Ëi à laurà truep tl training ntan l‘ultima enes y chësc àn pona nce udù tla partida. La scuadra à jugà scialdi bën tl prim tëmp, stlujan ju ntant per 0:2. Tl segondo tëmp se l'ài coche for durmida via mpue, à fat mé 1 n gol y se n à giapà doi dal Toblach. Tl terzo tëmp à duta la scuadra inò jugà scialdi miec, i à cialà de tenì l resultat y i pecs à fat n bon lëur. L ie mo tumà n gol per l Gherdëina a mez al tëmp y nsci à l Gherdëina venciù chësta partida per 4:2. I goi per l Gherdëina ie unii fai da: Matthias Perathoner (2), Nikolas Hofer y Julian Kostner.

U17 Gherdëina - Como 6:5 (2:0, 2:3, 2:2)
La Under 17 à fat n dumënia na partida contra l Como, che ne fova perdrët nia sun l program, ma che n à fat ora al ultim mumënt de la fé dant. Na partida inò scialdi cumbatuda contra l Como, ma nia jugheda bën da pert dl Gherdëina. Ala fin àla mpo mo butà a la tré decà, vencian de n gol per 6:5.
I goi per l Gherdëina ie unii fai da: Ben Linder (2), Giordan Insam, Julian Senoner, Tobias Fill y Tim Linder.

N mierculdi ai 15 de nuvëmber à la Under 19 jugà contra l Renon, ma davia che la redazion fova bele stluta, repurterons chëst’ena che vën l resultat de chësta partida.

Proscima partides di jëuni n cësa:
N sada ai 18.11. dala 14.00 juega la U13 contra l Persenon y n mierculdi 22.11. dala 17.00 contra l Puster. N dumënia ai 19.11. dala 11.00 fajerà la U11 n turnoi y dala 17.00 jugherà la U15 contra i Foxes de Bulsan.