N à cumbatù nchin ala fin

Ena ntensiva per i majeri di jëuni dl HC Gherdëina, che à abù doi dis de partida ndolauter, vel’un nce trëi.

U17 Gherdëina - Auer/Neumarkt 5:6 OT (1:1, 3:2, 1:2, 0:1)
Drët bën se à astilà la scuadra dla Under 17 n mierculdi ai 18 de utober tl stadio Pranives contra i prims te tlassifica dl Auer/Neumarkt. Tl prim tëmp ti àla bel riesc butà a fé l prim gol, ma pona se n ài giapà un y nsci ie l prim tëmp finà via sun l 1:1. Tl segondo tëmp se à l Gherdëina pona giapà mo n gol, ma tëmp de sies menuc ie i nosc stai boni de fé bën trëi goi, nsci che la stajova 4:3 per l Gherdëina do l segondo tëmp. Tl terzo tëmp àla purtruep sciacà y te zirca 30 secunc ti iel garatà ai averseres de fé bën doi goi. Śën fova l Gherdëina dovia, ma cin’ menuc dan la fin dla partida iesi mo stai boni de fé l 5:5. Sun na tela àn messù slungë la partida y jì tl "overtime". Bele do trëi menuc à l Auer/Neumarkt fat l gol dla vënta. Ma dut adum iel stat na bona partida, i mutons dl Gherdëina à dat dut y ti à tenì permez a l bon averser.
Per l Gherdëina àl fat i goi: Nicholas Paratoni (2), Kevin Schmalzl, Gabriel Stenico y Tim Linder.

U19 Kaltern - Gherdëina 3:2 d.P. (1:1, 1:0, 0:1, 0:0, 1:0)
Sciot per la partida dla Under 19 de n sada ai 21 de utober a Kaltern, purtruep perduda al ultimo mumënt ai penalties. Ntan duc i trëi tëmps fova la scuadres valives, a pensé che l Gherdëina à jugà cun belau mé pitli dla U17 davia che nce la prima scuadra ova na partida y trueps dla U19 à jugà iló. I mutons à jugà bën y ie stai boni de ti tenì permez ai averseres y à permò messù ti la zeder, coche bele dit, ai penalties.
Per l Gherdëina à Lukas Mair y Kevin Schmalzl fat i goi.

U19 Fascia - Gherdëina 4:1 (1:0, 2:0, 1:1)
Nce n dumënia à la Under 19 jugà (chëst'ena doi dis ndolauter) y la partida fova via n Fascia contra i cuarti te tlassifica. Do n prim tëmp ulache i mutons se à tenì drët bën, iesi tl segondo tëmp ruvei sun dlacia nia cunzentrei, à fat scialdi fai ndividuei y se à nsci nce giapà doi goi. Tl terzo tëmp iela inò jita mpue miec, ma l ne fova nia plu da n fé contra i fascians stersc y nscila ài perdù per 4:1. L gol per l Gherdëina ie unì fat da Diego Glück. Da auzé ora nce la prestazion dl verdiaporta Jan Moroder, che à jugà scialdi bën sibe n sada che n dumënia.