La U15 dl HC Gherdëina cun jugadëures plu jëuni, à tenì pea bën cun i averseres

L’ultima fin dl’ena iel stat doi partides di jëuni y una mo n mierculdi, ma davia che la redazion ova iló bele stlut, repurterons chëst’ena che vën dla partida dla Under 19

U15 Puster - Gherdëina 8:5 (3:1, 1:4, 4:0)
N dumënia ai 15 de utober à la scuadra dla Under 15 jugà a Burnech contra l Puster. La partida fova scialdi trata. Pra l Gherdëina àl jugà pea n valgun pitli o scialdi jëuni, davia che di majeri manciòvel vel' un per malatia y vel' auter che se à fat mel. I mutons ie stac mé bravi tenian pea cun i autri y jan tl segondo tëmp monce danora de n gol. Tl terzo tëmp àla mpue sciacà y ala fin ai perdù. L verdiaporta Manuel à fat scialdi n bon lëur y à pià dassënn.
Per l Gherdëina à Leo Messner fat 4 goi y Ben Linder un.

U17 Gherdëina - Asiago 2:7 (1:3, 0:4, 1:0)
N sada ai 14 de utober à la scuadra dla Under 17 jugà n cësa contra l Asiago. I mutons se à durmì via defin l prim tëmp, i ne fova nia cunzentrei y scialdi nervëusc. Ma i ie mpo stai boni de ti ruvé daujin y fé l 2:1. Purtruep se ài puech dan la fin dl prim tëmp mo giapà l 3:1 y chël ti à pona taià la giames ne cumbinan nia nce tl segondo tëmp. Tl terzo tëmp à l Gherdëina inò jugà miec, se purvan a jughé mpue plu deberieda, ma sambën fòvel massa tert per ti ruvé plu daujin al resultat di averseres y nsci ài perdù per 2:7. Per l Gherdëina à Tim Linder y Julian Senoner fat i goi.