Do l Carnescià inò ngrum de partides

La Under 8 à n sada ai 25 de fauré fat pea pra n turnoi a Corvara. L fova l prim turnoi da Carnescià che l HC Alta Badia à metù a jì. L à fat pea sies scuadres: l Bulsan Academy, l Toblach, l Sterzing, doi scuadres dl’Alta Badia y l Gherdëina. Ai mutons ti àl sapù scialdi bel y i ova na gran legrëza cun la copa che i à giapà nce sce i ie ruvei ultimi. Rengrazion l HC Alta Badia per l bel di che nosc pitli à pudù passé.

U12 Gherdëina - Maran 3:2 (0:1, 1:1, 2:0)
N sada ai 25 de fauré à la Under 12 jugà contra l Maran. Cun chësta partida y la proscima, che sarà duman sada ai 4 de fauré, s’la fajerà chësta doi scuadres ora per l 9. y 10. post dl campionat 2016/17 dla scuadres dl Südtirol. Tl prim tëmp dla partida de n sada à l Gherdëina sparanià mpue la forzes perdan 0:1. Tl segondo tëmp à Raphael Stenico valivà ora. Riesc do fova inò l Maran danora, nsci stajòvela 1:2. Tl terzo tëmp à i mutons metù l turbo y ti à lascià al Maran puecia pusciblteies de fé goi. Te chësc tëmp à Leo Moroder fat l prim gol y do mé 2 menuc à nce Nicolas Hofer fat l gol che ti à permetù à nosta scuadra de vëncer la partida.

U16 Eppan - Gherdëina 4:2 (1:1, 1:0, 2:1)
Purtruep à la Under 16 perdù chësta partida contra l Eppan n sada ai 25 de fauré. La partida fova perdrët ntan duc i trëi tëmps de juech bëndebò valiva, ma mpo ne àla nia tlecà a la vëncer y do che l trainadëur à tëut ora l verdiaporta iel mo tumà l cuarto gol per i averseres a cassa ueta. Per l Gherdëina àl fat i goi: Leo Messner y Tim Linder.

U19 Alleghe - Gherdëina 0:5 (0:2, 0:0, 0:3)
La scuadra dla Under 19 ie n lunesc ai 27 de fauré furneda a Alleghe a fé si partida de campiunat. I mutons dl Gherdëina à venciù do la rata saurì per 5:0 contra n averser plutosc dëibl, ma la fova mpo una dla plu stleta partides de chësta sajon. Tl prim tëmp ài jugà mo drët bën, ma tl segondo y terzo tëmp ne n’ài nia plu drë jugà deberieda, giapan nce vel' menut de straufonga de massa. Per l Gherdëina Juri Runggaldier (3), Simon Piccolruaz y Damian Bergmeister fat i goi.

Serie C Gherdëina - Sterzing 7:2 (2:0, 2:0, 3:2)
La serie C à jugà n vënderdi ai 24 de fauré n cësa contra l Sterzing. N messova cialé de vëncer a duc i cosć sce n ulova mo avëi na puscibltà de ruvé ti playoff, y nsci iela nce stata. I à venciù per 7:2 contra na scuadra ulache i se à scenó perdrët for stentà dassënn. L averser ne fova mei periculëus y l Gherdëina à cumbatù nchin al ultim menut per ne se lascé nia mucé ora dla mans chësta vënta. Per l Gherdëina àl fat i goi: Gabriel Senoner (2), Diego Glück, Andreas Vinatzer, Samuel Moroder, Damian Bergmeister y Lukas Mair.

Partides di jëuni n cësa: N sada ai 4 de merz dala 16.00 juega la U16 contra l Kaltern. N dumënia ai 5 de merz dala 10.00 fej la U14 contra l Vinschgau y la Serie C dala 18.00 contra l Valpellice.

FOTO: L verdiaporta dla U14/U16 Manuel Insam, che à fat n bon lëur n sada contra l Eppan.