Turnoi de S. Miculau per i plu pitli

La Under 16 muessa ti la zeder al Renon, ma vënc contra l Zoldo. La Serie C vënc l prim iede contra l Sterzing

Hockey/Jëuni - L turnoi tradiziunel de San Miculau per la scaudres Under 8, stat ai 8 de dezëmber a Sterzing, ie per duc i mutons for n bel avenimënt. L Sterzing nvieia uni ann for plu scuadres, chëst ann n fòvel bën ot, danter chëstes la scuadra de cësa di Broncos Sterzing, l Bulsan Academy, l Puster, l Pinè, l Trënt, l Zoldo, l Pieve di Cadore y sambën la scuadra de Gherdëina. Uni scuadra fajova cater partides y i pitli jugadëures de Gherdëina à fat drët n bon turnoi, se purvan dassënn y mustran dut chël che i à mparà nchin śën. Do l turnoi à duc giapà na pitla scincunda da San Miculau, na bedaia y na bona marënda te na blòta atmosfera da Nadel. Rengrazion l Sterzing per la urganisazion y per l turnoi scialdi garatà, n rengraziamënt ti va nce al trainadëur y a duc i acumpaniadëures, ma dantaldut ai pitli campions dla U8. Bravi mutons y mutans!

La Under 10 à n dumënia ai 11 de dezëmber fat pea pra l ultim turnoi dla prima pert dl campiunat U10 y à jugà tl Palaonda a Bulsan contra l Bulsan Foxes Junior (0:0), l Bulsan Academy (0:3), l Renon Junior (0:3) y l Persenon Junior (1:3, gol de Matteo Senoner). Nce chëst iede à i dodesc jugadëures y l verdiaporta fat n pitl parcour tecnich te n tëmp dut adum de 9 menuc y 12 secunc.

U16 Gherdëina - Renon 1:11 (0:0, 1:3, 0:8)
L di dla Imaculata à la scuadra dla Under 16 jugà n cësa contra l Renon. Doi tëmps ài tenì pea drët bën, tl terzo tëmp àla pona purtruep scialdi sciacà y l ne fova nia plu da n fé contra i prims te tlassifica y nsci à l Gherdëina perdù per 1:11. L gol per l Gherdëina ie unì fat da Tim Linder.

U16 Gherdëina - Pieve 4:3 (2:2, 0:0, 2:1)
N sada ai 10 de dezëmber ova pona la Under 16 bele la proscima partida n cësa contra l Pieve. La partida fova bëndebò valiva y scialdi cumbatuda. L Gherdëina à jugà bën y zënzauter merità chisc trëi ponc mpurtanc. Per l Gherdëina àl fat i goi: Nicolas Demetz (2), Marc Frisch y Tobias Moroder.

Serie C Gherdëina - Sterzing 5:4 d.p. (1:1, 1:1, 2:2, 0:0,1:0)
N vënderdi ai 9.12. à la scuadra dla serie C jugà n cësa contra l Sterzing. L ti manciova sibe a una che al’autra scuadra truep jugadëures davia che i fova demez a fé pea i mundiei dla U20. La scuadra dl Gherdëina à scumencià a jughé cun l drë sgors y tenì tres nchin ala fin nce sce i ova mé cater pecs. Doi iedesc iesi stai boni de jì danora de n gol, ma pona pervia de menuc de straufonga iesi for inò ruvei a n resultat a pèr che se à permò mudà trajan i penalties y vencian nsci la partida per 5:4. Per l Gherëina àl fat i goi: Damian Bergmeister (2), Juri Runggaldier y Gabriel Senoner. L penalty dezijif fova de Damian Bergmeister.

Foto:
Dancà da m. c.: Romy, Joey, Samuel, Lean, Jannik y Mike. Dovia da m. c.: Marco, Diego, Marika, Christian, Adam, Noè y Nicolas, Christian Piccolruaz (trainadëur), Maurizio Broll, Daniela Senoner y Günther Kasslatter (acumpaniadëures). Sun la foto mancia la acumpaniadëura Patty Broll.