Sies partides y un n turnoi chëst'ena

La Under 8 a n dumënia ai 22 de jené inò fat pea pra n turnoi te si ”girone”. Ë ie jic a jughé a Kaltern, iló ài fat trëi partides: contra l Kaltern, l Renon y pona mo contra l Bulsan Accademy. Udon che chësta scuadra jëuna y nueva vën da juech a juech for miëura y che la ueia de fé pea pra chisc turnoies ie granda. N rengraziamënt ti va nce al trainadëur Marco Senoner che à judà ora pra chësc turnoi.

La Under 10 à jugà n dumënia ai 22 de jené pra n turnoi n cësa contra la scuadres dl HC Bulsan Foxes Junior vencian per 4:0 (goi de Arik Kasslatter, Tobias Santifaller, Alan Schwingshackl y Matteo Senoner), pona contra l HC Toblach perdan per 0:3 y l HC Alta Badia perdan tl ultimo menut per 2:3 (goi de Jonas Kostner y Jonas Piccolruaz). I mutons à jugà drët bën y à mustrà cie che i à mparà ntan duc i alenamënc de chësta sajon. Na gran lauda ti va nce al verdiaporta Arik Plancker.

U14 Renon - Gherdëina 9:3 (3:2, 2:1, 4:0)
La scuadra dla Under 14 à jugà n dumënia ai 22 de jené n cësa contra la scuadra dl Renon. I mutons ne n’à nia jugà bën y à perdù plutosc sëch per 3:9. I trëi goi per l Gherdëina fova de Leo Messner.

U19 Gherdëina - Fascia 3:0 (2:0, 1:0, 0:0)
La scuadra dla Under 19 à jugà n dumënia n cësa contra l Fascia, che fova ala fin dla prima pert dl campiunat a cë dla tlassifica. L fova na partida scialdi nteressanta cun de bela azions da tramedoi pertes. L Gherdëina à ala fin venciù per 3:0 contra la bona scuadra dl Fascia. Na gran lauda nce al verdiaporta Leo Kostner che à fat n partiton. Per l Gherdëina àl fat i goi: Samuel Moroder (2) y Damian Bergmeister.

Serie C: Gherdëina - Pieve 10:3 (4:1, 3:1, 3:1)
Na bona partida à nce fat la scuadra dla serie C n vënderdi ai 20 de jené contra l Pieve, cun chëi che l Gherdëina à ntan chësta sajon nce bele perdù. Na bela partida cun n gran publich a cialé pro, che à pona nce abù la sudesfazion de udëi de biei goi. Vënta zënzauter meriteda per 10:3. Per l Gherdëina àl fat i goi: Simon Vinatzer (4), Patrick Nocker (2), Patrick Kelder, Gabriel Senoner, Samuel Moroder y Damian Bergmeister.

U19 Pergine - Gherdëina 1:2 (1:0, 0:1, 0:0, 0:1)
N merdi ai 24 de jené ie la Under 19 furneda a Pergine per fé na partida. L ie unì jugà bëndebò dur y la partida fova scialdi cumbatuda. L Gherdëina ie bën trëi iedesc ruvà sëul dan cassa dl averser, ma la scipa ne ulova nia jì ite. Doi iedesc ài nce tucà l pel y nsci stajòvela do l tëmp reguler 1:1. Mé mpue plu de n menut dl "Overtime" ti iel al Gherdëina garatà, cun n gol de Andreas Vinatzer, la bela vënta. I doi goi per l Gherdëina fova de Andreas Vinatzer.

Proscima partides di jëuni n cësa:
N sada ai 28 de jené dala 11.15 iel n turnoi U12. For duman sada ai 28 de jené dala 15.00 juega la U16 contra l Eppan. N dumënia ai 29 de jené dala 17.30 fej la U19 contra l Asiago.