La Under 8 vënc tramedoi partides

La Under 8 (foto) à inò fat pea pra n turnoi, chëst iede n dumënia 7 de fauré a Bulsan tla Sill. L à fat pea la scuadres dl Renon, Bulsan Academy, Leifers y Gherdëina. Coche bele i autri iedesc àn udù che l Gherdëina ie la scuadra cun l plu jugadëures, cossa che fej gran plajëi. Sëidesc n iel de ndut, duc fova prejënc y duc à pudù jughé. L proscimo turnoi sarà n cësa te Sëlva ai 21 de fauré dala 10.00, ulache duc ie nviei a fé n gran tifo a chisc pitli jugadëures.

U10 Gherdëina - Neumarkt 2:6
N sada ai 6 de fauré à la U10 jugà n cësa contra l Neumarkt. La ne à nia massa butà y i mutons à perdù per 2:6. I goi a fat Jonas Piccolruaz y Erik Kantioler.

La Under U12 à jugà n dumënia domesdì, ai 7 de fauré, a Bulsan tla Sill. La ne ti à nia drë butà pra chësc turnoi de cualificazion. I mutons ova scialdi respet dai bulsanins davia che i fova belau duc de n cë majeri. Purempò se ài defendù bën, ma la à sciacà a fé goi. Contra l Maran ài jugà scialdi bën, lascian jì la scipa y fajan de bela azions. Purempò àla inò sciacà dassënn a fé goi y ala fin ài nsci perdù la partides. Scialdi sciot, ajache i se ëssa merità deplù. Chisc i resultac dla partdies: Bulsan Academy - Gherdëina 1:0; Gherdëina - Bulsan Academy 0:2; Maran - Gherdëina 2:1; Gherdëina - Meran 0:1. L gol per l Gherdëina ie unì fat da Marvin Kasslatter.

U14 Sterzing - Gherdëina 7:2 (3:1, 2:0, 2:1)
Purtruep ne ti àla nia butà n sada ala Under 14 a Sterzing. I mutons dl Gherdëina ova mpue scialdi respet dal averser y ne se à nia nfidà a jughé coche i sà da jughé. Pona ti àla mo sciacà a vel’un y vel’auter jugadëur y nsci ài perdù per 2:7. Per l Gherdëina àl fat i goi Philipp Demetz y Julian Senoner.

U16 Gherdëina - Pieve 1:10 (0:5, 1:4, 0:1)
Nia da n fé per la Under 16 n dumënia ai 7 de fauré contra la scuadra sterscia dl Pieve cun jugadëures fisicamënter scialdi plu stersc y majeri. L Gherdëina à cumbatù y purvà dla dutes, ma contra chësta scuadra fòvel bën massa rie jughé. L gol per l Gherdëina ie unì fat da Fabian Kasslatter.

U18 Torino - Gherdëina 1:10 (0:4, 0:3, 1:3)
Venciù saurì à la Under 18 n mierculdi ai 3 de fauré a Torino. La partida ne fova nia scialdi nteressanta y l ie mé unì jugà da una na pert, i averseres ne ie mei stac periculëusc. Ma nianca 2 menuc dan la fin na burta ntraunida: do na burta plateda su per la "Banden" ne se muova l jugadëur dl Gherdëina nia plu y n à messù cherdé l’ambulanza y l mené te spedel. Do duta la vijites iel unit ora che l mut ova na gran bota sun l spinel y messerà śën dé gheneda per n pez. Ti mbincion dut l bon y che l varësce prësc. Per l Gherdëina àl fat i goi Juri Runggaldier (6), Damian Bergmeister (3) y Lukas Mair.

U18 Sterzing - Gherdëina 2:6 (1:3, 1:0, 0:3)
Do n bon prim tëmp tla partida dla Under 18 n sada ai 6 de fauré a Sterzing, se à la scuadra dl Gherdëina pona durmì via defin l segondo tëmp, minan povester bele de avëi venciù. Nsci ài tl terzo tëmp messù se dé na scasseda y la à butà a fé mo n valgun goi vencian nscila la partida per 6:2. Per l Gherdëina àl fat i goi Andreas Vinatzer (3), Damian Bergmeister, Diego Glück y Lukas Mair.

U20 Pergine - Gherdëina 6:2 (1:1, 2:0, 3:1)
Sciacà àla n dumënia ala Under 20 a Pergine. Nce sce l Gherdëina à trat scialdi deplù sun cassa che i averseres ne ulova chësta scipa nia jì ite te cassa dl Pergine, ëi ntant sce ie stai boni de nuzé miec la ucajions da gol. Per l Gherdëina àl fat i goi Patrick Kelder y Andreas Vinatzer.

Partides di jëuni n cësa:
Mé una na partida iel chësta fin dl’ena n cësa y plu avisa chëla dla U20 n dumënia ai 14.2. dala 17.30 contra l Cortina.