De biei juesc y partides cumbatudes

Turnoi Under 12
I mutons dla Under 12 à jugà n la ultima dumënia te Sëlva contra la scuadres de Toblach y dl Renon. I pitli dl Gherdëina à jugà scialdi bën la prima doi partides contra l Toblach n vencian nce una. Contra l Renon, che ie dessegur na scuadra sterscia, à i mutons mpue durmì, lascian pro true’ de massa ai averseres. Sciot per chësta partida, speron che la vede miec l iede che vën. Chisc i resultac dla partides: Toblach - Gherdëina 0:1, Gherdëina - Toblach 0:2, Renon - Gherdëina 3:0, Gherdëina - Renon 0:6. Per l Gherdëina à Tommy Delucca fat l gol.

U14 Toblach - Gherdëina 3:14 (0:4, 2:5, 1:5)
Nia scialdi da dì ne n’iel dla partida de n mierculdi ai 11 de nuvëmber contra l Toblach. Na partida scialdi saurida per i mutons dla Under 14, ulache l ie tumà truep goi y n à venciù saurì. Per l Gherdëina à Tobias Moroder y Tobias Fill fat cater goi prun, trëi goi à fat Leo Messner, doi goi Markus Mair y un n gol Nicolas Paratoni.

U14 Sterzing - Gherdëina 6:2 (3:1, 1:0, 2:1)
N sada ai 14 de nuvëmber ie la Under 14 furneda a Sterzing a jughé contra scialdi na bona scuadra. Dessegur se tratòvel de na partida bëndebò ria, ma sce i mutons ne ëssa nia abù tan n gran respet fóssel dessegur nce sautà ora vel’ gol deplù, ajache la ucajions ne manciova segur de no. Dantaldut i jëuni se à cumpurtà drët bën y à cumbatù nchin ala fin. Per l Gherdëina àl fat i goi Giordan Insam y Nicolas Paratoni.

U16 Gherdëina - Auer 2:3 (0:0, 1:1, 1:2)
N dumënia 15 de nuvëmber à i mutons dla Under 16 mustrà n hockey da stramp bel y de cualità. Do che l prim tëmp ie finà via sun l 0:0, fova la mutivazion mo n tan’ granda contra l Neumarkt che ie segondi te tlassifica, y i mutons ie stai boni de valivé ora sun l 1:1 tl segondo tëmp. Tl terzo menut dl segondo tëmp fova l Gherdëina monce jit danora y nchin al 12ejim menut vneciovi per 2:1. Purtruep iel pona ruvà tres n fal di jugadëures dl Gherdëina l 2:2 di averseres. N doi menuc dan la fin fova la fertuna dala pert dl Neumarkt, che do avëi drucà dut cie che i fova boni, ti iel garatà l terzo gol. Purempò iel da vester plu che cuntënc cun n tel resultat, ajache la ueia di mutons ie scialdi granda y n vëija che i à mparà truep leprò.
Per l Gherdëina à Leo Messner y Nicolas Demetz fat i goi.

U18 Gherdëina - Torino 10:0 (1:0, 6:0, 3:0)
Coche n vëija dal resultat fova la partida dla Under 18 dl Gherdëina n sada ai 14 de nuvëmber n cësa contra l Torino scialdi saurida. Tl prim tëmp se ài stentà n puech a fé goi, ma tl segondo tëmp ti iela jita fata a n fé sies y ala fin ài venciù saurì per 10:0 cun n bel shootout per i doi verdiaporta Leo Kostner y Jan Moroder, bravi!!!
Per l Gherdëina àl fat i goi Damian Bergmeister (3), 2 goi prun Andreas Vinatzer y Juri Runggaldier, un n gol prun Marc Frisch, Leo Holzknecht y Lukas Mair.
N mierculdi ai 18 de nuvëmber à la Under 18 jugà n cësa contra l Chiavenna, de chësta partida repurterons tla proscima Usc.

U20 Gherdëina - Sterzing 4:5 overtime (1:1, 3:3, 0:0, 0:1)
Do la vënta ai penalties da pert dla scuadra dla Under 20 dl Gherdëina lassù a Sterzing de utober, se à śën l Sterzing tëut la ”revanche” y à venciù te Gherdëina tl tëmp sëuraprò. Scialdi scialdi sciot, chësta partida fossa propi stata da vëncer, davia che l Gherdëina fova plu sterch che i averseres. Sarà per l proscimo iede! Per l Gherdëina àl fat i goi Samuel Moroder (2), Juri Runggaldier y Leo Holzknecht.

Partides di jëuni n cësa: Sada ai 21.11. dala 17.30 jugherà la U18 contra l Sterzing. (im)