Truepa partides

U19

Neumarkt/Auer - Gherdëina/Renon 7:2

Tla partida de dumënia à l Gherdëina jugà ora de cësa contra l Neumarkt/Auer che à n chësc di metù ala strëntes nosta scuadra, trajan bën 55 iedesc sun cassa permez ai 22 dl Gherdëina/Renon. Mpo fova nchin ite per l terzo tëmp l resultat drët valif, nce sce for cun i averseres danora. Tëmp de doi menuc se ài pona giapà cater goi y nsci fòvel ala fin na vënta tlera per l Neumarkt/Auer. Goi per l Gherdëina de Tobias Graf y Tommy Delucca.

U17

Renon/Gherdëina - Asiago 3:2

Partida scialdi valiva nce chëla dla U17 dl ultim mierculdi contra la scuadra sterscia de Asiago, ulache l ie for stat l Renon a jì danora, ma cun i averseres che à for inò valivà ora. Tl 50ejim menut iel tumà l gol che à fat vëncer la scuadra de cësa. Goi per l Renon/Gherdëina de Tobias Graf (2) y Leo Spornberger. Tl prim tëmp àl jugà l verdiaporta jëunn Diego Ploner y ti autri doi Florian Plattner.

Pergine - Renon/Gherdëina 2:10

Na "goleada" iel stat tla partida de n sada ai 20 de nuvëmber, ulache l Renon/Gherdëina ie unit a frida a tré bën 54 iedesc sun cassa, permez ai 16 di averseres, vencian nsci saurì chësta partida. Da dì iel povester che pra tramedoi i goi che i se à giapà, fovi cun n jugadëur de manco sun dlacia. I goi per l Renon/Gherdëina ie unii fai da Max Oberrauch (2), Tobias Graf, Matthias Perathoner (2), Tobias Weissensteiner, Kevin Senoner, Manuel Clementi, Paul Innerhofer, Alex Oberrauch.

U15

Alleghe/Alta Badia - Gherdëina 9:2

N mierculdi ai 17.11. iel stat la partida de campiunat contra l Alleghe/Alta Badia. La doi scuadres che se à da puech metù adum à nsci truep jugadëures fisicamënter scialdi stersc. Purtruep se à nosc jugadëures stentà a tenì pea per duta la partida y nscila ie l resultat finel tumà ora aut per la scuadra aversera. I goi per l Gherdëina ie unii fai Jannik Kasslatter y Lean Auer.

Fassa/Fiemme - Gherdëina 4:0

N dumënia ai 21.11. iela jita inant per la U15 cun na partida n cësa contra i ujins de Fascia/Flëm. L Gherdëina, che à da puech nce n trainadëur nuef y che fej n bon lëur cun i mutons i mutivan dassën, ie stai boni de mustré n bel juech de scuadra. Tl prim tëmp se à l Gherdëina giapà n valguni goi plutosc ndolauter perdan l tëmp per 3:0, ma do la paussa ài tl segondo y terzo tëmp jugà drët bën tenian l resultat. L Gherdëina à perdù chësta partida per 4:0 se giapan ala fin mo n gol tl powerplay. Rengrazion l trainadëur Roman Vaněk y ti mbincion ala scuadra U15 dut l bon per la proscima partides speran che i posse purté a cësa de bon resultac.

U13

Pustertal Junior - Gherdëina 9:4

N partida de campiunat drët cumbatuda ie stata chëla de n sada ai 13.11. tl stadio de Burnech. La scuadra U13 de chëla che l fej pert mutons nasciui danter l 2009 y l 2011 ie stata bona de mustré n bon juech y nscila ie l prim tëmp finà via cun l resultat de 2:1 per l Puster. I mutons dl Gherdëina à jugà inant cun gran mpëni contra la scuadra sterscia de Puster. Ala fin à nosc jugadëures perdù la partida per 9:4. I goi per l Gherdëina ie unii fai da Jannik Kasslatter (3) y Johannes Nogler Kostner.

HCB Foxes Academy - Gherdëina 8:1

N sada ai 20.11. à i jugadëures dla U13 fat si partida a Bulsan tl Palaonda contra l Bulsan Foxes Academy. Scumencià à la scuadra dl Gherdëina drët bën, tenian pea cun i averseres, ma danz che puech dan la fin dl prim tëmp se ài giapà n valgun goi, finan via chësc tëmp per 4:1. Davia che la partida à scumencià dala ot da sëira, scumenciova i jugadëures dl Gherdëina à sentì la stanchëza. Ala fin ai messù ti la zeder ai patrons de cësa per 8:1. L gol per l Gherdëina fova de Jannik Kasslatter. Purempò iel da ti fé n cumplimënt ai nosc dla U13 che juega cun n valgun jugadëures jëuni che ie permò passei a chësta categuria y che puderà jughé tlo mo doi ani.

Brixen/Wipptal - Gherdëina 13:6

Bele n merdi ai 22.11. iela pona jita inant cun na partida che fova da fé do, plu avisa a Persenon contra la scuadra plu sterscia de chësc campiunat, metuda adum da jugadëures dl Persenon y dl Sterzing. Bele dan scumencé la partida savova i nosc tan rie che chësc juech fossa stat y nscila ti iesi jic permez ai averseres cun gran respet perdan l prim tëmp. Tl segondo y terzo tëmp à l trainadëur dl Gherdëina pona mudà la linies y nscila ie i nosc stai boni de tenì pea miec. L resultat finel ie pona stat de 13:6 per la scuarda HC Brixen/Wipptal. I goi per l Gherdëina ie unii fai da Johannes Nogler Kostner, Diego Pezzei y Jannik Kasslatter (3). 

Turnoi n cësa per la U11

N dumënia ai 21.11. ova i mutons dla U11 n turnoi stadio Pranives te Sëlva. La scuadres che ie unides adalerch per chësc turnoi ie l Alta Badia, l Pustertal y l Lana. La prima partida fova contra l'Alta Badia. La scudra de Gherdëina à scumencià drët bën chësc turnoi batan nsci chësta scuadra per 4:1. La segonda partida fova contra l HC Pustertal y tlo se stentovi bele mpue deplù, jugan purempò drët bën. Chësc juech ie unì venciù dala scuadra aversera per 6:2. L ultimo juech ovi contra la scuadra de Lana y nce tlo ài dat gas vencian per 7:4. L trainadëur y duc adum fova drët cuntënc cun l resultat.

U9, turnoi a Latsch

N sada ai 20.11. ie nosc pitli dla U9 jic a fé n turnoi a Latsch. L viac ie mpue lonch ma ai pitli ti sàl n bel mat a jì duc deberieda cun l pulmin cun si cumpanies. La scuadres averseres pra chësc turnoi fova l Vinschgau, l Renoni y l Persenon. L prim juech fova contra l Persenon, ulache i nosc à scumencià drët bën, vencian la partida per 7:4. L segondo juech fova pona contro l Renon y iló fòvel bele da udëi mpue de stanchëza. I averseres ie stac plu stersc y i à messù ti la zeder per 9:4. L terzo juech fova mo contra l Vinschgau y tlo fòvel da udëi che i nosc fova drët stanc, dl'energia mustreda tla prima partida ne fòvel plu da udëi nia. Nsci ài nce perdù chësta partida per 8:4. La proscima partides arài duman sada a Maran. "Toi toi toi" a nosc pitli dla U9!