Bela vënta contra l Asiago

U11

Ntan l fin dl'ena dl 23 y 24 de utober iel unì metù a jì l segondo turnoi Under 11 y plu avisa iesi chëst iede furnei a Eppan. Iló à i pitli dl HC Gherdëina jugà contra l HC Eppan, HC Pustertal y l HC Maran. La prima partida fova contra i pustri y nosc mutons fova plëns de energia y à scumencià l juech drët bën. Tosc ti iel nce garatà doi goi y la stajova 2:0. Povester se ài ncunfertà massa abenëura, ma do n pez se à la situazion mudà y ora de nia fova i pustri danora. La partida ie pona fineda 4:2 per l HC Pustertal y n muessa dì che l ie propi sciot davia che nosc mutons a jugà veramënter bën y à dat dut. L segondo juech fova contra l HC Eppan y pra chësc juech, al incontra dl prim, ne n'iesi nia stac boni de fé n bon juech y de ti tò la scipa ai averseres. Chësta partida ie pona fineda via 11:1 per l HC Eppan. La terza partida fova pona contra l HC Maran y do na ciaculeda cun l trainadëur y n valgun cunsëies de co fé miec, iesi jic sun dlacia inò cun na drëta ueia de vëncer. I à jugà drët bën, dajan via y ca la scipa n grum de iedesc y nsci ti iela finalmënter garateda de i bater. Chësc juech ie finà via 11-1 per l HC Gherdëina. L proscimo turnoi per la scuadra U11 sarà a Alleghe y avisa saràl n turnoi de doi dis cun truepa d'autra scuadres. Ti mbincion che la ti bute, alè Gardena!!

U19

HC Gherdëina – Asiago 2:1 

Na partida scialdi cumbatuda ie stata chëla de n dumënia ai 24 de utober tl Stadio Pranives de Sëlva, danter l HC Gherdëina y l HC Asiago. Nce sce chëst ann vëijen l Asiago dovia tla tlassifica y l Gherdëina dancà, iel for n averser sterch y la va de dé dut. Nsci iela nce stata. Scumencià à la partida cun n ritm asvelt y tramedoi scuadres ie riesc ruvedes ite tl juech. L Gherdëina/Renon ie stat bon, do mé 4 menuc, de fé l prim gol. Inant nchin ala fin dl prim tëmp à tramedoi scuadres abù plu ucajions, ma l ie finà via cun 1 a 0 per l HC Gherdëina. Ruvei de reviers sun dlacia fòvel śën l Asiago che ova l juech tla man, fajan nce si prim gol. Ma l Gherdëina/Renon ne se à nia lascià mëter sot y ie mo puech dan la fin dl segondo tëmp stat bon de fé l 2 a 1. Tl terzo tëmp fòvela mpue plu muvimenteda, i jugadëures scumenciova a unì mpue plu furiëusc se giapan menuc de straufonga, nia mé chëi dl Gherdëina ma nce da pert dl Asiago. Ma per fertuna a nosc pecs y nosc verdiaporta fat n bon lëur. La partida ie nsci fineda via cun l resultat de 2 a 1 per nosc jëuni. I goi per l HC Gherdëina ie unii fai da Nicholas Paratoni y Tobias Moroder.

Quelle: Usc di Ladins