La U9 à finà via n belëza

Ai 9 de merz à nosc pitli dla U9 abù si ultim turnoi dla sajon 2018/19 a Bulsan. La scuadres averseres fova chëst iede l HC Maran, l HC Toblach y i Foxes-Academy White. La prima partida fova contra l Maran, ulache la doi scuadres fova bëndebò valives sun dlacia. La dlacia ne fova nia tla miëura cundizions y i jugadëures tumova do la rata suënz. L à durà n pez nchin che i ie ruvei ite sciche l toca tl juech y pona ài nce venciù chësta prima partida per 3-2. La segonda partida fova contra l Toblach. Tlo jugova nosc mutons bele scialdi miec, ma nce chësta scuadra teniva dur y inò fòvel n bel juech da udëi, che ie pona jit ora 4-4. L'ultima partida fova pona contra l Bulsan, ulache i nosc se à giapà bele bëndebò tl scumenciamënt n goal. I minova bele de pierder contra chësta scuadra, ma riesc ti iel garatà l goal nce ai nosc y nsci ài inò giapà snait y jugova drët bën. L jiva ite n gol ndolauter y l Gherdëina à venciù ala fin per 7-1. Nscila àn finà via chësta sajon drët bën, vencian ntan duta la sajon bën 18 partides! Per festejé iesen jic mo duc deberieda dal Mc Donald's y ai mutons ti àl sapù drët bel! Rengrazion duc chëi che à for judà ntëurite y dantaldut i trainadëures y i mutons che ie for leprò cun gran pascion.

U15 Gherdëina - Bulsan Foxes Academy 1:6 (0:3; 1:1; 0:2)
N juebia ai 7 de merz à la U15 abù si prima partida di cherc de finela di playoff contra l Bulsan. Tl prim tëmp fova i averseres miëures y ti à fat bele ti prim diesc menuc trëi goi ala scuadra dl Gherdëina. Tl segondo y terzo tëmp teniva pona l Gherdëina pea cun l Bulsan, trat sun cassa àn feter unfat, ma la ne butova nia a fé ite goi y nsci à nosc mutons perdù chësta partida per 1:6. L gol per l Gherdëina ie unì fat da Ben Linder.

U15 Bulsan Foxes Academy - Gherdëina 6:1 (1:0; 1:0; 4:1)
N dumënia ai 10 de merz fòvel pona la partida de ëuta per la U15 a Bulsan. Nce tlo ne àla nia ulù vester, nce sce per doi tëmps à i mutons tenì pea drët bën. Tl terzo tëmp se ài pona giapà 4 goi, perdan nce chësta segonda partida. Cun chësta ie nsci fineda via nce per chësta scuadra la sajon 2018-19. L gol per l Gherdëina ie unì fat da Tommy Delucca.

U19 Eppan - Gherdëina 3:0 (0:0; 2:0; 1:0)
N mierculdi ai 13 de merz à la scuadra dla U19 jugà si ultima partida de campiunat a Eppan, inò n iede cumpedei y sciche segondo verdiaporta à messù tenì ca n jugadëur. La scuadra aversera fova plu ativa y n udova che i ulova vëncer chësta ultima partida. Fina via l campiunat nce per la U19.