Bën 25 goi à fat i pitli dla U9 pra l ultim turnoi

Na gran ueia de fé a hockey à mustrà i plu jëuni dl HC Gherdëina ntan che i majeri se à trat via na partida che i ëssa tucà da vëncer

Under 9
N sada ai 23 de fauré iel stat a Toblach l penultim turnoi de chësta sajon. I pitli dl HC Gherdëina ëssa iló messù jughé contra l HC Alta Badia, l WSV Sterzing y l HC Toblach. Danz che l HC Alta Badia ne à nia pudù fé pea l turnoi y nsci àn fat ora de fé doi partides contra l Toblach y doves contra l Sterzing. La prima partida fova contra l Sterzing y nosc mutons ie jic sun dlacia cun n druch y na ueia de jughé coche dinrer. Nce i goi ne à nia mancià y nscila iesi stac boni de vëncer chësc prim juech per 6:1. La segonda partida fova contra l Toblach y nce tlo ne ti iela nia jita fata ala scuadra aversera de ruvé dan nosta cassa, tan da druch fova nosc pitli n chël di. Nce chësta scuadra à messù ti la zeder y la partida ie fineda cun l beliscimo resultat de 12:2 per l HC Gherdëina. Danterite iel unì fat n pitl parcour per nosc mutons, ntan che l’autra doi scuadres jugova ntra d’ëiles. Riesc iela pona jita inant cun la terza partida, chëst iede inò contra l Sterzing. I nosc dajova mo for dassënn gas y nsci iesi stac boni de vëncer nce chësta partida cun l bel resultat de 6:1. Davia che nosta scuadra fova la sëula a avëi mé doi linies y un n verdiaporta y se ova tan purvà tla prima trëi partides, udòven che la forzes jiva śën a piz. L ultimo juech contra l Toblach fova nsci plu valif y n menut dan la fin fova l resultat de 1:1. Ot secunc dan la fin ti iel mo mucià ite la scipa ai nosc y nsci ài perdù chëst'ultima partida per 2:1. Purempò muessen dì che l fova n resultat da stramp bon per nosc pitli campions dla U9. Cumplimënc!!

U15 Valpellice - Gherdëina 5:4 d.p. (1:0; 1:3; 2:1; 0:0; 1:0)
N dumënia ai 24 de fauré ie la U15 furneda a Torre Pellice per fé na partida mpurtanta de chësc campiunat. Do n viac lonch ie i nosc jic sun dlacia cun na gran ueia de vëncer. Do l prim tëmp stajòvela 1:0 per i averseres, tl segondo tëmp 3:1 per l Gherdëina. Scialdi nteressanta iela jita inant tl terzo tëmp, finan via cun l resultat de 4:4. Tl "overtime" ne n’iel pona tumà degun gol y a tré i penalties, che ie la gran pert na roba de fertuna, ti àla butà ai averseres, nsci che n à messù ti lascé la vënta al Valpellice. Ma un n pont, che ie scialdi de mpurtanza, ài mpomo pudù se tò a cësa. Per l Gherdëina àl fat i goi: Davide Macaluso (3) y Ben Linder.

U17 Maran - Gherdëina 1:9 (0:5; 1:2; 0:2)
N sada ai 23 de fauré à la U17 jugà contra l Maran. L Gherdëina à duminà duta la partida y à venciù saurì per 9:1. L trainadëur Walter Ploner à pudù purvé ora cun i mutons n valguna cosses nueva per njinië ca la scuadra ai play off che sarà śën tosc. Per l Gherdëina àl fat i goi: Leo Messner y Nicholas Paratoni (2), Leo Rabanser, Anton Perathoner, Alexander Vigl, Julian Senoner y Tobias Moroder.

U19 Gherdëina - Milano 2:6 (0:2; 1:1; 1:3)
Na partida da desmincë fova chëla dla U19 n dumënia ai 24 de fauré contra l averser plu dëibl, l Milano, ultim te tlassifica. I mutons ne à nia dat dut y ne à nia desmustrà chël che i savëssa da fé. Sciot per chësta partida trata via. Per l Gherdëina àl fat i goi: Nicholas Paratoni y Leo Messner.