Venciù sëch y perdù sëch

Mpue su y ju iela jita cun i resultac dla scuadres di jëuni dl HC Gherdëina ntan chësc ultim fin dl‘ena

U15 Gherdëina - Asiago 0:8 (0:2; 0:5; 0:1)
N vënderdi ai 15 de fauré à la U15 messù fé na partida che fova unida spusteda pervia dla neveres. Chësta partida contra l Asiago ne n’à defin nia butà. I mutons dl Gherdëina ne fova nia boni de ruvé ite tl juech y ne jiva nia sun l "mandl". Do l prim tëmp fovi bën “mé“ doi goi dovia y minova mo de vester boni de la tré decà, ma pona ne ti iel plu garatà nia y l Gherdëina à perdù sëch per 0:8.

U15 Gherdëina - Vinschgau 6:5 (1:3; 2:2; 3:0)
Miec iela pona jita n dumënia ai 17 de fauré contra l Vinschgau, che ova un n pont deplù che l Gherdëina. Do n bon scumenciamënt, fajan l prim gol, se à i mutons giapà la sperduda de trëi goi dal averser mo tl prim tëmp. Do l segondo tëmp fovi for mo de doi goi dovia, ma tl terzo tëmp ài pona dat gas sciche l toca, fajan trëi goi y ne se n giapan plu degun. Nsci ài mo trat decà chësta partida de un n gol y la legrëza fova sambën granda, tan granda che n pere de n jugadëur à nvià duta la scuadra, trainadëures y acumpanidëures a maië la pizza. N gra de cuer a d’ël! Per l Gherdëina àl fat i goi: Davide Macaluso (3), Lukas Ausserhofer, Ben Linder y Nicolas Hofer.

U17 Gherdëina - Milano 10:0 (2:0; 6:0; 2:0)
N sada ai 16 de fauré à la scuadra dla U17 jugà n cësa contra l Milan. Partida scialdi saurida per l Gherdëina contra n averser dëibl, che ne n’ie mei stat periculëus. I mutons à venciù per 10:0 cun n bel "shutout" per i doi verdiaporta Ivan Crepaz y Manuel Insam, che à jugà mesa partida prun.  Per l Gherdëina àl fat i goi: Nicholas Paratoni (3), Julian Senoner y Tobias Moroder (2), Alexander Vigl, Anton Perathoner y Ben Linder.

U19 Gherdëina - Cortina 2:8 (1:3; 0:3; 1:2)
N dumënia à la U19 jugà contra l Cortina. Scumencià à l Gherdëina drët bën, jan danora do cin’ menuc cun l prim gol. Do y do iela jita juvier, nce pervia de duc i menuc de straufonga che i jugadëures dl Gherdëina à giapà. Ala fin ài perdù mpo mpue sëch per 2:8. Per l Gherdëina àl fat i goi: Nicolas Demetz y Leo Messner.