Trat decà plu de una na partida

L à jugà mé la majera scuadres di jëuni dl HC Gherdëina y dutes à venciù.

U15 Gherdëina - Aosta 5:3 (1:0; 2:1; 2:2)
N dumënia ai 20 de jené à la U15 jugà n cësa contra l Aosta. La partida fova scialdi valiva y trat sun cassa iel unì feter unfat da tramedoi pertes. L Gherdëina fova nchin belau a mez al terzo tëmp danora de n gol o doi, ma pona ti iel garatà al Aosta l 3:3 y nsci messòven inò zitré, ma 10 menuc dan la fin dla partida ie l Gherdëina inò jit danora y 12 secunc dan la fin ài mo fat l 5:3 a cassa ueta. Per l Gherdëina àl fat i goi: Lukas Ausserhofer, Ben Linder, Kevin Senoner, Davide Macaluso y Tommy Delucca.

U17 Gherdëina - Maran 5:2 (2:0; 0:2; 3:0) 
N sada ai 19 de jené fòvel tl Pranives de Sëlva na partida dla U17 contra l Maran, che à scumencià scialdi bën per l HC Gherdëina y ie jit danora per 2:0. Tl segondo tëmp à i nosc lascià do dassënn y nsci à l Maran valivà ora sun l 2:2. Do na pitla craunia da pert dl trainadëur Timo Keppo à i mutons dl Gherdëina tl terzo tëmp inò jugà n bel hockey vencian per 5 a 2 y se à nsci davanià 3 ponc che ti juderà per jì inant tl campiunat. Per l Gherdëina àl fat i goi: Julian Senoner (3), Nicholas Paratoni y Leo Rabanser.

U19 Gherdëina – Val de Flëm 6:3 (1:2; 3:0; 2:1)
N mierculdi ai 16 de jené à la scuadra dla U19 jugà n cësa contra l Fiemme. Scumencià à l Gherdëina la partida mpue a pe zot, nsci che n fova do l prim tëmp de n gol dovia. Tl segondo tëmp iela pona jita suvier, ulache l ti ie garatà trëi goi, ne se n giapan degun. Tl terzo tëmp fova pona i jugadëures de tramedoi scuadres scialdi sun banch di straufei y manco sun dlacia. Ala fin à l Gherdëina venciù chësta partida per 6:3. Per l Gherdëina àl fat i goi: Bean Schmalzl (2), Nicholas Paratoni, Tobias Moroder, Florian Moroder y Kevin Schmalzl.

U19 Gherdëina - Eppan 5:4 do t.s. (0:3; 1:1; 3:0; 1:0)
N dumënia ai 20 de jené ova la U19 da fé mo na partida n cësa y avisa contra l Eppan. Partida tl prim tëmp mpue durmida via dai nosc, che se à giapà bën trëi goi dal averser. Nce do l segondo tëmp perdova l Gherdëina mo per 1:4. Ma i ne l’à perchël nia zeduda y cun gran ardimënt iesi stai boni de valivé ora l resultat finan l tëmp reguler sun l 4:4. Nsci iel unì slungià la partida y per fertuna ti àla butà al Gherdëina, che bele do 38 secunc à fat l 5:4. Te cassa fòvel chëst iede l verdiaporta Felix De Bortoli che vën da Puster. Per l Gherdëina àl fat i goi: David Galassiti (2), Bean Schmalzl, Leo Rabanser tl tëmp reguler. Leo Messner à fat fat l gol dla vënta tl "Overtime".