Tan che duc à venciù

Ena de suzes chësta per la scuadres di jëuni dl HC Gherdëina, che se à fat valëi te duta la partides

La U9 à abù n sada ai 12 de jené si otavo turnoi y chëst iede iesi furnei a Corvara. La scuadres che à fat pea fova daujin al HC Gherdëina, l HC Alta Badia, l SV Kaltern y l HC Pustertal. La prima partida ova l Gherdëina contra i pustri, che à jugà drët bën y i nosc ne n’ie purtruep nia stac boni de ti sté permez, perdan nsci chësta prima partida. Da dedò iela jita inant contra l’Alta Badia, ulache i pitli dl Gherdëina à jugà scialdi miec che tla prima partida. Nscila iesi stac boni de vëncer, cun na gran legrëza. L ultimo juech fova pona contra l HC Kaltern y nce tlo à l Gherdëina jugà scialdi bën, trajan truep iedesc sun cassa dl averser. Purtruep ne ulova la scipa nia jì ite y ala fin à pona venciù l Kaltern. L proscimo turnoi sarà n sada ai 26 de jené 2019 a Sterzing.

U13 Gherdëina - Toblach 4:3 (3:1; 0:1; 1:1)
N sada ai 12 de jené à la U 13 jugà n cësa tl stadio Pranives de Sëlva contra la scuadra dl HC Toblach Icebears. Chëst iede ti àla propi butà y i à venciù per 4:3. Tl prim tëmp à i averseres bele do doi menuc purvà a pië danora, fajan l prim gol, ma nosc mutons à respundù riesc cun l 1 a 1 y jan danora ala fin dl prim tëmp per 3 a 1. Tl segondo tëmp ài mpue’ lascià do, ma ie mpo stac boni de resté danora. Tl terzo tëmp, do che i averseres à valivà ora sun l 3 a 3 se ài inò descedà respundan cun l 4 a 3, ne se lascian nia tò chësta prima vënta y sambën i trëi ponc mo leprò. Per l Gherdëina àl fat i goi Kevin Senoner, Leo Moroder y Erik Kantioler (2).

U15 Gherdëina - Valpellice 2:1 (0:1; 2:0; 0:0)
N dumënia ai 13 de jené iela jita inant tla fasa naziunela dla U15. Chëst iede à nosc mutons pudù fé si partida n cësa tl stadio de Sëlva. Bele do puec secunc iel tumà l prim gol da pert dl Valpellice, ti dajan nsci na pitla scasseda ai nosc, che semea ne fova mo nia drë njeniei. L juech fova drët asvelt y i jugadëures dl Valpellice fova boni sui jadins. Cun l mpëni de duta la scuadra dl Gherdëina iel pona nce tumà, do cater menuc dl segondo tëmp, l 1 a 1 che ti à dat na gran mutivazion a duc i jugadëures. Tl segondo tëmp iel unì cumbatù dassënn y nosc mutons ulova vëncer. Nscila iel tl 37ejim menut de juech tumà l segondo gol per l Gherdëina, che à purtà nosta scuadra danora. L Valpellice à drucà dut l terzo tëmp, ma ne n’ie nia stat bon de valivé ora y nscila à nosc mutons venciù chësta partida. I mutons dl Gherdëina à fat na bela partida y se à metù da na pert trëi ponc per la partides che vën. La legrëza fova granda. Per l Gherdëina àl fat i goi Marc Kasslatter y Marcel Comploi.

U17 Milano - Gherdëina 0:14 (0:3; 0:7; 0:4)
N sada ai 12 de jené à la scuadra dla U17 jugà a Milan. De chësta partida ne n’iel nia da dì truep, l resultat rejona per sé. L Gherdëina à venciù sëch. Per l Gherdëina àl fat i goi: Leo Rabanser (4), doi goi prun à fat Nicholas Paratoni, Tobias Moroder, Leo Messner y Giordan Insam, un n gol prun à fat Lukas Ausserhofer y Gabriel Stenico.

U19 Alleghe - Gherdëina 2:3 (1:1; 1:1; 0:1)
N dumënia ai 13 de jené à la U19 jugà contra l Alleghe. Partida scialdi valiva nchin ala fin. 39 secunc dan la fin dla partida ie l Gherdëina stat bon de fé l 3:2 y nce sce i averseres à sun na tela tëut ora l verdiaporta, ne se à i nosc nia plu lascià tò chësta bela vënta. Dui trëi i goi ie unii fai tl "powerplay", che chëst ann ti buta dassënn. Per l Gherdëina àl fat i goi: Leo Messner (2) y Tobias Moroder.