N ti ie stac permez a averseres scialdi stersc

La U9 ova n sada ai 17 de nuvëmber l cuarto turnoi te chësta sajon. Chëst iede iesi furnei a Corvara. La scuadres che à fat pea fova l HC Alta Badia, l WSV Sterzing, l HC Maran y sambën l HC Gherdëina. I mutons se ncunforta for dassënn sun chësc di y do che i se ova sciaudà ite fòvel l mumënt de jughé contra l Maran. Chësta ie na scuadra scialdi bona y nosc mutons à desmustrà de pudëi tenì pea se purvan dassënn. Venciù à mpo l Maran. La segonda partida fova contra l Sterzing y nce chësta partida ne iesi de puech nia stac boni de vëncer. La terza partida fova contra l Corvara, ulache i à mo tëut ca si ultima forzes y ie bel mpont stac boni de vëncer. I mutons fova da stramp cuntënc y se ncunforta bele sun l proscimo turnoi a Persenon, chëst’ena che vën ai 1. de dezëmber.

U13 Gherdëina - Cortina/Pieve 4:17 (0:0, 2:8, 2:9)
La U13 à jugà n sada ai 17 de nuvëmber n cësa contra l Cortina/Pieve. Tl prim tëmp ài jugà scialdi bën ne ti lascian al Cortina deguna puscibltà de fé n gol (0:0). Tl segondo tëmp ài pona messù mudé l verdiaporta y la partida à giapà n’autra dinamica. I jugadëures dl Cortina se à riesc rendù cont che l verdiaporta fova plu dëibl y à perchël metù man de tré scialdi deplù sun cassa. Per nosc mutons fòvel nsci rie a paré ju y i averseres fova mpo mo boni de fé vel' gol (2:8). Tl terzo tëmp ne se àl nia mudà truep, ma i mutons à cumbatù nchin ala fin perdan purtruep per 4:17. 
Per l Gherdëina àl fat i goi: Christian Bernardi, Nicolas Andriolo y Erik Kantioler(2)

U15 Sterzing - Gherdëina 4:6 (0:3, 1:2, 3:1)
N mierculdi ai 14 de nuvëmber à la U15 jugà contra l Sterzing. Ti prim doi tëmps se à i jugadëures dl Gherdëina fat bëndebò saurì y ie jic danora per 5:0. Mpue dan la fin dl segondo tëmp ài giapà l prim gol, tl terzo tëmp sciacòvela po’ dassënn, ulache i se n à giapà mo trëi pervia de fai ndividuei. Ala fin àla mo butà y i à venciù per 6:4.
Per l Gherdëina àl fat i goi Tommy Delucca (2), Nicolas Andriolo, Davide Macaluso, Ben Linder y Marc Kasslatter.

U15 Gherdëina - Bulsan Academy 2:4 (1:1, 1:1, 0:2)
N dumënia ai 18 de nuvëmber ova la U15 da jughé la proscima partida y chël n cësa contra l Bulsan Academy. Nce sce n savova che l averser ie bëndebò sterch, à i mutons dl Gherdëina tenì pea bën ntan duta la partida y à fat scialdi n bel juech, fajan monce l prim gol. Tl terzo tëmp stajòvela 2:3 per i autri y un se n ài mo giapà a cassa ueta. Na gran lauda ti va nce al verdiaporta Arik Plancker dla U13 de mé 11 ani, che à pià dassënn. Sciot per chësta partida, i autri à abù mpue plu fertuna.
I doi goi per l Gherdëina ie unii fai da Ben Linder.

U17 Neumarkt - Gherdëina 4:2 (2:1, 1:1, 1:0)
N sada ai 17 de nuvëmber à la scuadra dla U17 jugà contra l Neumarkt, che fova mpue miëur che l Gherdëina. Purempò ài tenì permez nchin ala fin dla partida. A un n menut dan la fin perdovi mé de un n gol. L trainadëur à mo purvà a tò ora l verdiaporta, ma al Junior Team ti iel mo garatà n gol a cassa ueta dl Gherdëina. Nce sce i à perdù ài jugà bën, l mancia mé mo l ultimo sgors per vëncer na partida.
Per l Gherdëina àl fat i goi: Leo Messner y Julian Senoner.

U19 Neumarkt - Gherdëina 2:5 (1:2, 1:0, 0:3)
La scuadra dla U19 à jugà n dumënia ai 18 de nuvëmber contra l Neumarkt. Beliscima partida da pert dl Gherdëina tl prim tëmp. Da dedò à l arbitradëur ulù vester prutagonista dla partida partian ora dantaldut al HCG straufonghes ora de uni mesura y nsci à l Neumarkt valivà ora sul 2:2. Tl terzo tëmp à i jugadëures dl Gherdëina inò fat n bel hockey vencian ala fin per 5:2. Scialdi n bon lëur à nce fat l verdiaporta Leo Kostner che à pià bën 40 tiri.
Per l Gherdëina àl fat i goi: Tim Linder, Gabriel Stenico, Leo Messner, Alexander Vigl y Bean Schmalzl.

Proscima partides di jëuni n cësa:
la U15 jugherà n dumënia ai 25.11. dala 18.00 contra l Renon.