Doi de bela vëntes per la Under 15

Vel’ partida ie i jëuni dl HC Gherdëina stac boni de tré decà, vel’ autra àn perdù mpue sëch. Ma la streda ie mo longia, cun truep da mparé, nce dai fai

Under 11
N dumënia ai 14 de utober à nce per la scuadra Under 11 scumencià la sajon y avisa cun n turnoi a Corvara. I à jugà doi partides da 15 menuc contra l Renon y doi partides contra l’Alta Badia. Tl scumenciamënt fòvel  bëndebò sfadiëus per i jugadëures, che per la majera pert, jugova l prim iede te chësta categuria U11, ulache l vën jugà sun duta la plaza dala dlacia y ulache l vën baratà al jol, zënza fermé l juech. Messon dì che, per vester stat l prim turnoi, se à l Gherdëina astilà bën desmustran de avëi na gran ueia de mparé a tenì pea nce a chësc livel. L proscimo turnoi unirà fat a Maran ai 28 de utober

U13 Gherdëina – Sterzing 2:11 (1:5, 0:4, 1:2)
N sada ai 13 de utober à la U13 dl Gherdëina jugà n cësa contra l Sterzing, scuadra sterscia a chëla che l fova rie ti tenì permez.
Nicolas Andriolo à fat tramedoi goi per l Gherdëina.

U15 Gherdëina - Sterzing 10:7 (5:3, 2:3, 3:1)
La scuadra dla U15 à jugà n vënderdi ai 12 de utober n cësa contra l Sterzing. Na partida ulache l ie tumà truep goi da una y dal'autra pert. L Gherdëina fajova n gol y pona se n giapovi inò un, nsci iela jita nchin al resultat de 6:6. Ma i jugadëures dl Gherdëina à mo fat n valguna de bela azions y ala fin iesi stac boni de tré decà la partida, y chësc fej propi bon ala moral dla scuadra.
Per l Gherdëina àl fat i goi: Ben Linder y Tommy Delucca à fat 3 goi prun, Marc Kasslatter (2), Ruben Prinoth y Davide Macaluso un n gol.

U15 Renon - Gherdëina 5:6 (2:2, 2:1,1:2, 0:0, 0:1) 
N dumënia à la U15 inò jugà, chëst iede contra l Renon. L Gherdëina à scumencià drët bën fajan i prim doi goi. Pona ài lascià do mpue y i averseres à tl segondo tëmp abù la sëuravënta, jan danora de n gol. Tl terzo tëmp ài inò jugà drët bën y ala fin àn messù s’la fé ora ai penalties ulache la ti à butà al Gherdëina vencian nsci chësta partida scialdi ciauda y nteressanta. Pià dassënn ntan duta la partida à l verdiaporta dl Gherdëina Ivan Crepaz.
Per l Gherdëina àl fat i goi: Marc Kasslatter y Ben Linder 2 prun y Davide Macaluso un n gol. L penalty dezijif fova de Davide Macaluso. 

U17 Gherdëina - Auer/Neumarkt 5:10 (0:3, 2:3, 3:4)
N sada à la U17 jugà n cësa contra l Auer/Neumarkt. L Gherdëina ne n’à nia jugà melamënter, ma i averseres fova massa stersc per ti vester y nsci àn perdù per 5:10. 
Per l Gherdëina àl fat i goi: Tobias Moroder (2), Nicholas Paratoni, Gabriel Stenico y Leo Rabanser.

U19 Bulsan Academy - Gherdëina 7:1 (4:0, 2:1, 1:0)
I mutons dl Gherdëina ne n’à nia scumencià bën chësta partida, se giapan nce massa menuc de straufonga. Tl segondo tëmp ài pona jugà cun plu disziplina y à nce jugà mpue plu cunzentrei. Ma la partida ie mpo unida perduda per 1:7.
L gol per l Gherdëina ie unì fat da Julian Senoner.

La proscima partides di jëuni n cësa:
Ncuei vënderdi 19.10. dala 17.00 juega la U19 contra l Asiago y n dumënia ai 21.10. dala 12.30 fej inò la U19 contro l Milano. N dumënia juega pona nce la U15 dala 16.00 contra l Pieve. (im)