La U19 à fat l prim gran var

Per la Under 19 dl HC Gherdëina se tràtela śën de ruvé ite ti playoff. Fineda via iela per la Under 17

U15 Toblach - Gherdëina 1:10 (0:3, 0:4, 1:3)
La scuadra dla U15 ie n dumënia ai 4 de merz furneda a Toblach a jughé contra la scuadra da iló. I mutons à fat una de si miëura partides dla sajon, fajan bën 10 goi y se n giapan mé un. Nce l verdiaporta jëunn Ivan Crepaz à fat n boniscimo lëur. Bravi! Per l Gherdëina àl fat i goi: Leo Messner y Ben Linder à fat trëi goi prun, Marvin Kasslatter, Leo Rabanser, Tommy Delucca y Alexander Vigl à fat un n gol prun.

U17 Puster - Gherdëina 3:1 (1:0, 1:1, 1:0)
La scuadra dla U17 à finà via n merdi ai 6 de merz l campiunat contra i pustri, che ruva nsci inant. L Gherdëina à jugà scialdi bën y la partida fova valiva nchin ala fin. Ma la ie nsci che l possa mé jì inant una na scuadra y l Gherdëina ie purtruep tumà ora. Purempò muessen dì che i mutons à fat n gran var inant, unian for miëures. Bravi mutons y a n auter ann. L gol per l Gherdëina ie unì fat da Tim Linder.

U19 Kaltern - Gherdëina 2:5 (1:1, 0:2, 1:2)
N vënderdi ai 2 de merz à la U19 jugà si penultima partida tl "girone" de cualificazion contra l Kaltern. N messova sambën cialé de vëncer sce n ulova ruvé ti prims doi tla tlassifica de grupa, per avëi l'ucajion de ruvé ti playoff y l fova bën mo cater scuadres che pudova s'la fé ora per chisc doi posć. Tl prim fova i mutons dl Gherdëina mpue nervëusc, ma do y do iesi ruvei ite tl juech, à jugà bën ntan che i averseres fova frustrei ajache chisc goi ne ulova nia ti garaté, sambën per fertuna dl Gherdëina y per la bona prestazion de nosc verdiaporta Leo Kostner che piova dut! Per l Gherdëina àl fat i goi: Damian Bergmeister (2), Nicolas Demetz, Bean Schmalzl y Andrea Demetz.

U19 Maran - Gherdëina 2:6 (1:1, 1:1, 0:4)
Nce sce la scuadra dla U19 fova bele segur laite danter i prims doi dla tlassifica, ài nce venciù l’ultima partida contra l Maran saurì per 6:2.
Cun chësta partida ie l Gherdëina prim tl "girone" de cualificazion y messerà śën s'la fé ora te doi partides cun i otaves dl "girone Masterround" che ie l Valpellice. La prima partida ie stata n mierculdi ai 7 de merz te Sëlva (repurteron l resultat chëst’ena che vën) y la segonda sarà n dumënia ai 11 de merz a Valpellice. La scuadra che fej plu ponc ruva pona definitivamënter ite ti "playoff". Speron che la ti buta! Per l Gherdëina àl fat doi goi prun Diego Glück y Andreas Vinatzer, Kevin Schmalzl y Damian Bergmeister à fat un n gol prun.

Proscima partides di jëuni n cësa: la U13 fajerà n sada ai 10.3. dala 12.00 contra l Bulsan. (im)