I jëuni dl HC Gherdëina se bat bën

Bona partida dla U13 contra i miëures dl campiunat. La U19 se à davanià trëi ponc mpurtanc per avëi la puscibltà de ruvé di play off

Under 9
La U9 à fat pea pra n turnoi n sada ai 20 de jené a Sterzing. I mutons ova da fé trëi partides, davia che l fova cater scuadres che à fat pea. La prima partida contra l Academy Bulsan ài perdù, l ultimo iede a Corvara iesi stai boni de vëncer cun chësta scuadra. Tla segonda partida contra l Sterzing y la terza contra l Leifers se ài pona fat ert a abiné la mutivazion per cumbater inant, perdan nsci nce chisc doi juesc. L proscimo turnoi sarà ai 3 de fauré tl stadio Pranives te Sëlva, ulache nvion duc a unì a cialé pro y a sustenì chisc pitli.

Under 11
N dumënia ai 21 de jené à i mutons dla U11 jugà n cësa l ultimo turnoi dla segonda pert dl campiunat, chëst iede contra la scuadres dl HC Toblach y dl Juniorteam de Neumarkt y Auer. L fova inò da fé cater partides y i mutons à purvà a tré ora l miec de si capaziteies jugan drët bën y trajan nce n valgun iedesc sun cassa. La prima partida contra l HC Toblach ie nsci jita ora per 0:1 (gol de Leo Moroder) y la segonda per 7:0. Contra l Juniorteam ie la partides jites ora a pèr la prima (0:0) y 6:2 la segonda (goi de Alan Schwingshackl y Diego Greci). Nscila à i mutons pudù se tò pea a cësa bën 4 ponc. Bravi!
 
U13 Cortina - Gherdëina 3:2 (1:0, 0:1, 2:1)
La scuadra dla U13 ie furneda n mierculdi ai 16 de jené a Cortina a fé si partida de campiunat. I mutons savova che l ti aspieta na partida bëndebò ria, davia che l Cortina ne n‘à te chësta sajon mo mei perdù na partida y ie la scuadra plu sterscia. Ma l Gherdëina ie jit sun dlacia cun cunvinzion, se à purvà dassënn nsci che do l segondo tëmp stajòvela 1:1! I mutons ne fova nia boni de crëier. Tl terzo tëmp à l Cortina desmustrà de vester na bona scuadra, ma nosc jëuni ne dajova nia do. Ala fin ài mé perdù per 2:3, y chësc ie n boniscimo resultat per ëi y ie ruvei a cësa scialdi cuntënc. Tramedoi goi per l Gherdëina ie unii fai da Matthias Perathoner.

U13 Persenon - Gherdëina 10:1 (2:1, 5:0, 3:0)
La scuadra dla U13 ova pona bele n sada ai 20 de jené la proscima partida contra l Persenon. La partida à scumencià bën, i mutons y la muta savova che i ova da nfé cun na scuadra sterscia y se à purvà, tenian pea bën nchin ala fin dl prim tëmp, ulache l segondo gol dl Persenon per l 2:1 ie permò tumà ala fin de chësc. Tl segondo y terzo tëmp ulovi pona fé massa y ne univa nia a una, i ne se criva nia sun dlacia y ne fova nia plu boni de tré te cassa di autri. La partida ie fineda via melamënter per nosta scuadra, che à perdù per 10:1. L gol per l Gherdëina fova de Alan Schwingshackl.
 
U15 Persenon - Gherdëina 6:3 (3:1, 2:1, 1:1)
Nce la scuadra dla U15 à perdù a Persenon y chësc n dumënia ai 21 de jené. Tl prim tëmp se l’à l Gherdëina mpue durmida via. Da dedò ài bën mo cumbatù dassënn y à dat gas, trajan suvënz sun cassa, ma l verdiaporta di autri piova danz dut. Ala fin ne ti iela nia jita fata de pië i averseres y nsci ài perdù per 3:6. Per l Gherdëina àl fat i goi: Leo Messner, Lukas Ausserhofer y Ben Linder.

U17 Gherdëina - Val de Flëm 5:1 (0:0, 3:0, 2:1)
La scuadra dla U17 à n sada ai 20 de jené jugà n cësa contra l Fiemme. I nosc à fat na bona partida, lascian pro scialdi puech al averser. Tl scumenciamënt se ài mpue fat ert a fé goi, ma do y do iela jita miec y l Gherdëina à for abù la partida tla man, drucan ite l Fiemme te si zona. Bravi mutons inant nscila! Per l Gherdëina àl fat i goi: Ben Linder (2), Julian Senoner, Kevin Schmalzl y Tim Linder.

U19 Gherdëina - Kaltern 4:3 (1:1, 2:0, 1:2)
N dumënia ai 21 de jené à la scuadra dla U19 jugà n cësa contra l Kaltern. Partida scialdi mpurtanta chësta per avëi mo l mesun de ruvé ti prims doi dl “girone“ de cualificazion per i play off. Na partida coche dit sentida da tramedoi pertes y for nteressanta y da sté ert nchin ala fin. Sun l 3:1 do l segondo tëmp stajòven bele mpue plu saurì, ma pona ti iel garatà l 3:2 al Kaltern y nsci fòvel bele inò da zitré. L Gherdëina à pona fat l cuarto gol y ne se à nia plu lascià tò chësta vënta nce sce l averser à mo fat n gol y tëut ora l verdiaporta cun doi jugadëures deplù sun dlacia (un dl Gherdëina fova sun banch di straufei). Ala fin àn venciù mé de n gol, ma se à davanià trëi ponc scialdi mpurtanc.
Per l Gherdëina àl fat i goi: Damian Bergmeister (2), David Pescosta y Tim Linder.

Partides di jëuni n cësa: la U15 jugherà n dumënia ai 28.1. dala 12.00 contra l Toblach.