I prim trëi ponc per la Under 13

Truepa partides ntan chësta ultima ena, cun vel’ bel suzes ma nce vel’ piersa che ne messova nia vester

U11 - N dumënia ai 5 de nuvëmber à i mutons dla Under 11 pudù saludé pra n turnoi n cësa la scuadres dl Persenon y dl Sterzing. Chësc fova l cuarto di dl campiunat Under 11, che vën jugà tla forma de turnoies. Jugan contra l Persenon ne ti àla nia drë butà ai pitli dl Gherdëina y i à perdù sëch per 0:2 y 0:13. Ntan che l Persenon à pona jugà contra l Sterzing, à i nosc pudù paussé mpue y tla partida contra l Sterzing iela pona jita miec y i à fat bën doi ponc cun n resultat de 1:1 y 1:1 (tramedoi i goi ie de Leo Moroder).

U13 Gherdëina - Alleghe 3:2 (2:0, 0:0, 1:2)
N vënderdi ai 3 de nuvëmber à la Under 13 jugà n cësa contra l Alleghe. L ie stata na bela partida, ajache bele dal scumenciamënt ova i mutons na gran ueia de vëncer. Y nce sce l Alleghe à trat scialdi plu iedesc sun cassa che l Gherdëina, ie l prim tëmp finà via sun l 2:0 per i nosc, de gra nce al verdiaporta sterch Arik Plancker. Tl segondo tëmp iela jita ora 0:0, ma l ne à nia mancià la ucajions da pert de tramedoi scuadres. Tl terzo tëmp à pona i mutons dl Gherdëina inò scumencià cun sgors y à bele do doi menuc fat l terzo gol. L Alleghe à pona scumecià a jughé mpue plu cun druch y l ti ie nce garatà doi goi. Ma nosc mutons ne à nia dat do y à finà via la partida cun n bel 3:2, se davanian i prim 3 ponc dl campiunat. Per l Gherdëina àl fat i goi: Julian Kostner, Niklas Piccolruaz y Nikolas Hofer.

U15 Gherdëina - Toblach 13:1 (2:0, 5:0, 6:1)
La scuadra dla Under 15 à jugà n dumënia ai 5 de nuvëmber tl stadio de Sëlva. I mutons dl Gherdëina à jugà bën y se passova bel la scipa. Nce l verdiaporta à tenì dut cie che fova da tenì. Dut adum na vënta meriteda y per i tifosi sambën bel a udëi tan de goi. Per l Gherdëina àl fat i goi: Leo Rabanser (5), 2 goi prun Alexander Vigl, Andrej Kostner y Leo Messner, 1 n gol prun Marvin Kasslatter y Ruben Prinoth.

U17 Como - Gherdëina 5:6 d.p. (1:2, 1:2, 3:1, 0:0, 0:1)
N l di de Unissant à la Under 17 messù furné a Como a fé si partida de campiunat. Trueps dla Under 15 ie jic pea, ajache n valguni fova demez pervia dla feries de scola. Na partida scialdi mpurtanta per l Gherdëina per pudëi jì inant tl campiunat cun la bona scuadres. Sun dlacia fòvel scialdi ciaut, davia che l stadio ie daviert y nsci se fajovi mpue ert. Ma i à cumbatù dassënn y la fova for ciauda. Tl terzo tëmp se à pona l Gherdëina mo giapà trëi goi y nsci àn messù jì tl "overtime" y pona ai penalties, che l Gherdëina à venciù per 6 a 5.
Per l Gherdëina àl fat i goi: Tobias Moroder (2), Davide Macaluso, Lucas Glück y Kevin Schmalzl. L penalty dezijif fova de Lucas Glück.

U17 Gherdëina - Maran 3:7 (1:2, 1:3, 1:2)
N sada ai 4 de nuvëmber ova la Under 17 mo na partida n cësa contra l Maran, na bona scuadra cun truep de gran jugadëures. Tl prim à i mutons dl Gherdëina mo tenì pea drët bën, i fova for mé de un n gol dovia y ova nce ucajions per valivé ora. Purtruep iel pona tumà massa menuc de straufonga y i averseres ne se à nia lascià mucé la ucajion fajan mo n valgun goi y nsci à l Gherdëina perdù per 3 a 7. Per l Gherdëina à Julian Senoner (2) y Kevin Schmalzl fat i goi.

U19 Gherdëina - Asiago 3:6 (1:3, 2:0, 0:3)
N juebia ai 2 de nuvëmber à la Under 19 jugà n cësa contra l Asiago, che ie prims te tlassifica. I nosc à tenì pea scialdi bën y ala fin dl segondo tëmp stajòvela 3:3. Cun la speranza y cunvinzion de pudëi vëncer iesi pona tl terzo tëmp jic sun dlacia, ma nce pervia de vel' fal ndividuel ne n’iel plu stat nia da n fé y i à perdù per 3:6. Purempò muessen dì che l fova na bona partida, ulache i mutons à tenì adum y se à purvà dassënn. Per l Gherdëina àl fat i goi: Nicolas Demetz, Kevin Schmalzl y Julian Senoner.

U19 Gherdëina - Torino 3:4 (2:1, 0:1, 0:2)
Na partida da desmincë fova chëla de n dumënia ai 5 de nuvëmber te Sëlva, ulache l Gherdëina à jugà contra i penultims te tlassifica dl Torino. Tl prim tëmp iela mo jita y i nosc ne à nia jugà tan melamënter y fova danora de 2:1. Pona iela jita dojù, l Gherdëina ne jugova nia plu bel deberieda nce per gauja de, coche suvënz, true massa menuc de straufonga, cun sibe n jugadëur dl Gherdëina che dl Torino che messerà lascé ora la proscima partida. Tl terzo tëmp ài mo purvà a la tré decà, ma la ne ti ie purtruep nia plu jita fata y nsci ài perdù per 3:4.
Per l Gherdëina à Diego Glück, Jan Demetz y Andrea Demetz fat i goi.