Tan che uni scuadra à jugà chëst’ena passeda

Te plu partides ntan chësta ena àn udù tan mpurtant che l ie a mparé a jughé deberieda, a fé n bon juech de scuadra

U9: La scuadra dla Under 9 à fat pea n sada ai 28 de utober pra n turnoi tl stadio Pranives de Sëlva. Chisc pitli jugadëures se à muserà cun la scuadres dl Renon, dl Toblach, dl’Alta Badia y dla Venuesta/Vinschgau. La prescion de jughé n cësa fova granda nce ajache l ie unit truep genitores y tifosi a sustenì i mutons dl Gherdëina. Ëi à dat dut nce sce ala fin ne àla nia for butà a ruvé ala contlujion y fé l gol, ma a duc canc ti àl sapù scialdi bel a jughé. Ulessan mo rengrazië duc chëi che à judà ntëurite a fé garaté chësc turnoi. L proscimo turnoi per la Under 9 sarà n sada ai 11 de nuvëmber a Curvea.

U11: Pra l turnoi de n dumënia ai 29 de utober a Kaltern àl fat pea la scuadres dl Gherdëina, dl Kaltern y dla Venuesta/Vinschgau. Pra chësc turnoi dura uni tëmp 15 menuc y vel coche na partida. I mutons dl Gherdëina à riesc jugà na partida ndolautra. La prima contra l Kaltern, ulache i à perdù per 1:6, gol de Alexander Canazei. L segondo tëmp ài perdù per 0:1. Da dedò ài pona jugà mpue miec. La segonda partida ai fat contra l Venuesta, ulache i à perdù per 0:2 y 0:4. Coche scuadra à l Gherdëina mo scialdi da mparé, ma son segures che l proscimo iede jiràla miec.

U13 Gherdëina - Sterzing 4:9 (1:1, 0:4, 3:4)
N sada ai 28 de utober à la scuadra dla Under 13 jugà tl stadio Pranives contra l Sterzing. Tl prim tëmp fova la scuadres feter valives, y l tëmp ie fina via per 1:1. Tl segondo tëmp se à nosc mutons mpue perdù y ne jugova nia coche scuadra. I se à giapà cater goi y ne fova nia boni de purté inant la scipa tla zona dl averser. Tl terzo tëmp, do che l trainadëur ti l’à cumetuda ai mutons, ài pona inò abinà l ritmus y ie stai boni de dé pro deplù y perchël iel nce garatà trëi goi. Nce sce i mutons dl Gherdëina à pona ala fin dla finedes perdù per 4:9, ài te chësta segonda partida de campiunat mparà truep.
Per l Gherdëina àl fat i goi: Niklas Piccolruaz (2), Nikolas Hofer y Nicolas Andriolo.

U15 Sterzing - Gherdëina 2:1 (0:0, 1:1, 1:0)
N dumënia ai 29 de utober à la Under 15 jugà a Sterzing si partida de campiunat. L Gherdëina à jugà bën y nce l verdiaporta à pià dassënn. La scuadres fova valives, ma mpo ne n’ie i nosc nia stai boni de la tré decà y à perdù, nce sce mé de n gol, per 1:2. Per l Gherdëina à Leo Messner fat l gol.

U19 Valpellice - Gherdëina 2:3 (0:1, 1:0, 0:2)
La scuadra dla Under 19 à n dumënia ai 29 de utober messù fé l viac lonch nchin a Valpellice. La partida fova scialdi valiva y l Gherdëina fova do l prim tëmp danora de n gol. Tl segondo tëmp à l Valpellice valivà ora, ma bele do 20 secunc dl terzo tëmp ie l Gherdëina inò jit danora y à stlut l sach cun gran ueia de vëncer tl ultimo menut dla partida. Purtruep iel nce unì jugà dur y puech rëidl y n jugadëur dl Gherdëina à messù se lascé cujì l slef.
Per l Gherdëina àl fat i goi: Nicolas Demetz (2) y Andrea Demetz.

Proscima partides di jëuni n cësa:
Ncuei vënderdi ai 3.11. dala 16.00 juega la Under 13 contra l Alleghe. Duman sada ai 3.11. dala 17.00 fej la Under 17 contra l Maran. N dumënia ai 5.11. dala 9.00 à la Under 11 n turnoi, dala 14.00 juega la Under 15 contra l Toblach y dala 17.00 à la Under 19 si partida contra l Torino.