I plu pitli à scumencià cun i turnoies

Resultac dla ultima partides dla scuadres di jëuni dl HC Gherdëina

Nce per i pitli dla Under 9 àl scumencià n sada ai 30 de setëmber l prim turnoi. Ëi ie jic a Eppan a fé bën cater partides. La prima contra l Eppan ulache la ne à nia massa butà. N muessa dì che on purtruep mé nuef jugadëures y nce sce l vën mé jugà de trëi contra trëi fòvel per nosc mutons scialdi sfadiëus a tenì pea cun i autri. Tla segonda partida cun l Bulsan Academy y la terza cun l Lana ài cialà de tenì pea, unian for miëures. Nsci ài tla ultima partida contra l Maran desmustrà na gran ulentà vencian chësc juech. N gra ti va a nosc  trainadëures Larry Sadler y Gabriel Lang che fej n bon lëur cun chisc mutons.
 
La Under 11 (foto) à n dumënia ai 8 de utober jugà a Maran l segondo turnoi de chësta sajon y à pudù se purté a cësa l prim pont. La partides ie jites ora nsci: Gherdëina contra Renon 0:3 y 0:2, Gherdëina contra Maran 1:1 y 0:4 (gol de Leo Moroder)
 
U15 Gherdëina - Persenon 6:1 (0:0, 3:1, 3:0)
N dumënia ai 8 de utober à la scuadra dla Under 15 jugà n cësa contra l Maran. I mutons à jugà cun gran mpëni. Tl prim tëmp se à la doi scuadres mpue cialà ju, l ne manciova nia i tiri sun cassa, ma i ne ulova nia jì ite. Tl segondo tëmp à pona l Persenon fat l prim gol, ma l Gherdëina à abù riesc lessù la reazion y ne ti à nia plu lascià pro ucajions ai averseres. Per l Gherdëina àl fat i goi: Leo Messner (3), Ben Linder, Davide Macaluso y Marvin Kasslatter.
 
U17 Gherdëina - Como 12:2 (3:0, 3:1, 6:1)
N sada ai 30 de setëmber à la scuadra dla Under 17 jugà tl stadio Pranives de Sëlva contra la scuadra dl Como. Scumencià à la partida mo drët valif, davia che i mutons dl Gherdëina ie ruvei ite bel plan tl juech, ma pona, do y do, àn udù la desferënzia de livel y i goi da pert dl Gherdëina ie tumei "a mascin". I mutons à venciù saurì per 12:2. Chësta vënta fej scialdi bon al moral di mutons. I goi per l Gherdëina ie unii fai da: Ben Linder (3), Tobias Fill (2), Kevin Schmalzl, Alexander Vigl, Leo Rabanser, Nicholas Paratoni, Julian Senoner, Leo Messner y Tommy Delucca.
 
U17 Maran - Gherdëina 3:1 (0:1, 2:0, 1:0)
La scuadra dla U17 ie n sada ai 7 de utober furneda a Maran a fé si partida de campiunat. L Gherdëina à scumencià scialdi bën jan danora per 1:0, tl segondo tëmp àn pona giapà true‘ massa menuc de straufonga y nsci ie l Maran stat bon de valivé ora y daldò monce de jì danora de n gol. Ala fin à l Gherdëina mo purvà de tò ora l verdiaporta, ma l ne ie stat nia da n fé, dut auter, n se à mo giapà n gol a cassa ueta perdan nsci la partida per 1:3. Mpo iel da dì che i mutons se à purvà dassënn y à jugà do la rata na bona partida. Per l Gherdëina à Tobias Fill fat l gol.
 
U19 Gherdëina - Cortina 0:3 (0:0, 0:1, 0:2)
Sciot per chësta partida de n dumënia ai 1. de utober. La à scumencià drët bën y n se à giapà l prim gol permò puech dan la fin dl segondo tëmp. I ultimi doi goi à chësta scuadra pona nce permò giapà ti ultimi cater menuc dla partida. L Cortina à scumencià a druché deplù y à venciù la partida per 3:0 trajan bën 45 iedesc sun cassa (l Gherdëina mé 19 iedesc), che desmostra inò la boniscima statistica de nosc verdiaporta.
 
La proscima partides di jëuni n cësa: La U17 jugherà n sada ai 14.10. dala 17.00 contra l Asiago.