Na stleta ena per i jëuni dl HCG

U11 - N dumënia ai 24.9. à i mutons dla Under 11 fat pea pra n turnoi a Corvara contra la scuadres dl Renon y dla Val Badia. Purtruep ne àla nia drë butà, l Gherdëina à perdù per 6:0 y 4:3 contra l Renon (goi de Jonas Piccolruaz, Jonas Kostner y Gabriel Turina) y 2:0 y 7:0 contra la scuadra dla Val Badia. Chësc fova l prim turnoi dla sajon, speron che la vede miec l iede che vën.

U13 Gherdëina - Cortina 0:9 (0:3, 0:1, 0:5)
Nce la Under 13 à abù si prima partida de campiunat n sada 23.9. te Sëlva contra l Cortina. I mutons dl Gherdëina se à tl scumenciamënt dla partida mpue studià ju l Cortina, ajache cun chëi ne n’ova ëi mo mei jugà. I savova che l fova na scuadra bëndebò sterscia y nsci ne n’ie l prim tëmp nia jit ora massa bën. Tl segondo tëmp ài jugà mpue plu cunzentrei y à mé giapà un n gol. Tl terzo tëmp se àn ntendù che i mutons dl Gherdëina fova mpue stanc, ajache i ne fova nia usei a na partida da trëi tëmps da 20 menuc, ma i se à purvà. L proscimo iede jirùla dessegur miec.

U15 Bulsan Foxes - Gherdëina 5:0 (1:0, 2:0, 2:0)
N dumënia ai 24.9. ie la Under 15 furneda a Bulsan tl Palaonda a jughé contra l Bulsan Foxes. L fova na partida valiva nce sce l resultat dij zeche d'auter. I mutons dl Gherdëina fova bën che drucova dassënn, purtruep ti àla scialdi sciacà y ai autri ti àla butà a fé goi y à nsci venciù chësta partida.

U19 Gherdëina - Neumarkt/Auer 2:4 (0:1, 2:1, 0:2)
Nce ala scuadra dla Under 19 ne ti àla nia drë butà n dumënia ai 24.9. tl stadio Pranives te Sëlva contra l Neumarkt/Auer. La scuadra de Gherdëina ie doi iedesc stata bona de valivé ora l resultat, ma pona, nce per gauja de massa menuc de straufonga, se àn tl terzo tëmp giapà mo doi goi y nsci perdù per 2:4. Na gran lauda iel da ti fé al verdiaporta Leo Kostner, che à pià dut cieche la jiva. Bën 46 iedesc ài trat sun si cassa! Per l Gherdëina àl fat i goi Lukas Mair y Andrea Demetz.

La proscima partides di jëuni n cësa:
La U17 juega n sada ai 30.9. dala 16.00 contra l Como. La U19 fej si partida n dumënia ai 1.10. dala 17.00 contra l Cortina.