L scumëncia i playoff

Per la Under 19 y la serie C vàla inant cun i playoff. La Under 10 à finà via si sajon

La Under 10 à n dumënia ai 19 de merz fat l ultimo turnoi de chësta sajon, chëst iede n cësa contra la scuadres dl HC Eppan (2:6), l WSV Sterzing Broncos Junior (0:2) y l Juniorteam de Neumarkt/Auer (1:2). Purtruep ne àla nia drë butà y i à perdù duta trëi la partides, purempò fajan vel' gol: Leo Moroder y Alan Schwingshackl (2).  

U14 Gherdëina - Toblach 5:4 (2:1, 2:1, 1:2)
La Under 14 à jugà n mierculdi ai 15 de merz te Sëlva contra l Toblach. L Gherdëina à jugà bën, nce sce ala fin iela mo unida ciauda canche l Gherdëina se à giapà doi goi dai averseres. Per fertuna àla ala fin mo butà y i à venciù per 5:4. Per l Gherdëina àl fat i goi: Leo Messner (4) y Leo Rabanser.

U14 Gherdëina - Vinschgau 2:5
Purtruep à pona la scuadra dla Under 14 perdù n sada ai 18 de merz n cësa contra l Vinschgau. La ne à dut ntëur nia butà y n à perdù contra na scuadra che fossa zënzauter stata da bater. Per l Gherdëina à Leo Messner fat i doi goi.

U19 Gherdëina - Sterzing 1:3 (1:0, 0:1, 0:2)
Cun na scuadra scialdi jëuna à la Under 19 jugà n vënderdi ai 17 de merz l’ultima partida dan i playoff, contra la scuadra dl Sterzing che fova tan che cumpleta. Davia che la ne se tratova plu de nia y l Gherdëina se ova bele segurà l segondo post, à i trainadëures lascià paussé i majeri che fej nce pea l campiunat dla serie C. I mutons à tenì pea drët bën ntan dut l juech y à ala fin monce abù n valguna ucajions per valivé ora l resultat, ma ala fin ne àla mpo no tlecà y i à perdù per 1:3. Mpo iel da ti fé na gran lauda ai plu pitli, trueps jugadëures dla Under 16. Per l Gherdëina à Simon Piccolruaz fat l gol.

U19 Gherdëina - Kaltern 4:0 (1:0, 2:0, 1:0)
N merdi ai 21 de merz à la Under 19 fat la prima partida de playoff n cësa contra l Kaltern. L Kaltern à mé jugà cun dodesc jugadëures ntan che l Gherdëina fova belau al cumplet. Nce sce l resultat ie tumà ora bëndebò tler, fova la partida mpo for ciauda y nce i averseres ova si ucajions da gol. Ala fin à l Gherdëina venciù cun merit per 4:0 y ie jit bele n juebia a Kaltern a fé la segonda partida. Speron che la ti bute. Per l Gherdëina àl fat i goi: Andrea Demetz (2), Samuel Moroder y Diego Glück.

Serie C: Torino - Gherdëina 4:5 d.p. (1:2, 2:1, 1:1, 0:0, 0:1)
Do n viac lonch nchin a Torino à la scuadra dla serie C jugà si ultima partida dan scumencé i playoff. Ntan duta la partida ne n’ie i jugadëures dl Gherdëina nia stac boni de jughé coche i sà da jughé. Tl terzo tëmp à l duo de trainadëures Marcel y Jozef Skokan lascià jughé mé plu doi linies mpede cater, ma nce iló ne ulòvela nia drë garaté se giapan monce l 4:3, ma per fertuna iesi mo stai boni de valivé ora dan la fin, jan nsci tl tëmp sëuraprò. Iló ne n’iel tumà degun gol y permò a tré i penalties ti àla butà al Gherdëina, vencian nsci chësta partida per 5:4. Per l Gherdëina àl fat i goi: Samuel Moroder, Gabriel Senoner, Juri Runggaldier y Simon Vinatzer. L penalty dezijif fova de Samuel Moroder. La scuadra dla serie C arà da furné n dumënia inò a Torino a fé si prima partida de playoff.

La proscima partides di jëuni n cësa: La U19 fajerà sce l ie debujën la terza de playoff contra l Kaltern. La U14 jugherà n dumënia ai 26 de merz dala 10.00 contra l Bulsan Academy. (im)