Auc y basc te chëst'ena per la scuadres di jëuni

La U10 ie n dumënia ai 5 de merz furneda a Sterzing per l penultim turnoi de chësta sajon. Purtruep ne àla nia drë butà y i à perdù duta la trëi la partides: contra l HC Alta Badia 3:0, contra l HC Sterzing Broncos Junior 4:1 (gol de Leo Moroder) y contra l HC Kaltern ënghe 3:0.

U12 Maran - Gherdëina 3:2 (2:2, 1:0, 0:0)
Tla partida dezijiva dla Under 12 a Maran, per s’la fé ora per l 9. post dl campiunat 2016/2017, ti àla purtruep mpue sciacà ai nosc. Do doi menuc de partida à Nicolas Hofer fat n beliscimo gol. Do mé ot menuc dl prim tëmp à Maximilian Moroder fat l segondo gol. Ma l Maran ie stat bon de valivé ora l resultat mo tl prim tëmp. Tl segondo tëmp à l Maran fat mo n gol y tl terzo tëmp ne n iel plu tumà deguni. Nsci ie la partida jita ora 3:2 per l Maran. Davia che la partida de ”andata” fova unida vënta dala scuadra de Gherdëina per 3:2, iesen jic ai penalties. Tlo à Nicolas Hofer y Matthias Perathoner fat i goi, ma l Maran ie stat bon de fé ite trëi penalties y se à nsci fat sie l 9. post y l Gherdëina à finà via nsci si sajon al 10. post. I mutons fova mpo drët cuntënc ajache i à mparà truep ntan chësta sajon y cëla bele inant al proscimo campionat.

U14 Bulsan - Gherdëina 8:5
La scuadra dla Under 14 à jugà n juebia ai 2 de merz tl Palaonda a Bulsan bele da mesa la nuef daduman. Tl prim ne ruvovi nia drë ite tl juech, bonamënter fovi mo mpue ndurmenzei, y se à giapà trëi goi te puec menuc. Da dedò à l trainadëur mudà verdiaporta per ti dé mpue na scasseda a duta la scuadra y i à recuperà drët bën, ma l fova danz bele mpue tert y ala fin ài mo perdù per 5:8. Per l Gherdëina àl fat i goi: Leo Messner (3), Davide Maccaluso y Marc Kasslatter.

U16 Gherdëina - Kaltern 5:3 (1:1, 1:1, 3:1)
La scuadra dla Under16 à jugà n sada ai 4 de merz si penultima partida de campiunat n cësa contra l Kaltern. La partida fova scialdi valiva. L Gherdëina à fat n bel juech de scuadra, se passan for bel la scipa y trajan trupe iedesc sun cassa, ma i goi ne ulova nia jì ite. Permò tl terzo tëmp se àl giaurì l buton y cun mo trëi goi à i mutons dl Gherdëina venciù per 5:3. Per l Gherdëina àl fat i goi: Gabriel Stenico (2), Nicholas Paratoni, Tim Linder y Leo Messner.

U19 Gherdëina - Puster 4:2 (0:1, 1:0, 3:1)
N lunesc ai 6 de merz à la Under 19 jugà n cësa contra i pustri. La partida fova nteressanta nchin ala fin, l Gherdëina drucova y trajova mo n tant che no i averseres, ma i se à stentà dassënn a ti fé i goi. Tl terzo tëmp ti àla pona butà a valivé ora, do che i fova mo dovia de n gol y pona de ti fé ite mo doi goi, vencian nsci cun merit per 4:2. Per l Gherdëina àl fat i goi: Samuel Moroder, Jan Demetz, Juri Runggaldier y Damian Bergmeister.

Serie C Gherdëina - Valpellice
La partida dla Serie C che ëssa dassù vester n la ultima dumënia, ne n’ie nia unida fata, davia che la scuadra dl Valpellice ne se à nia presentà.