De
Chësc turnoi ie unì metù a jì da n valgun/a acumpaniadëures cun l aiut de Harold y Barbara Schmalzl. A fé pea ie unic nviei i mutons dla U10-U12 y i genitores che ulova fé pea. N sada daduman dala 9 se àl pona prejentà nia mé chëi che fova nviei, ma nce n valgun mutons dla U14 y U8 che ne ulova nia se arjumé na tel blòta ucajion per se devertì.
L fova doi scuadres, sëidesc jugadëures cun la malies cuecenes dl Gherdëina y l verdiaporta Eugen Hofer, y chindesc jugadëures cun la malia blancia y te cassa l mut de Eugen, Nicolas Hofer, che ne n’à mo mei fat l verdiaporta. Nsci fòvel trëi linies per scuadra. Sambën fòvel te uni linia, sibe tla scuadra cuecena che tla blancia un n pere y cater mutons De ndut àl fat pea set peresc, vintecin’ mutons y na muta (Marika Piccolruaz).
Trainadëures fans per chëst iede nëus acumpaniadëures....
L ie unì jugà doi tëmps da 18 menuc cun l ”cambio” uni menut y mez. La scuadra blancia à fat trëi goi y plu avisa Leo Moroder, Simon Quitta y Kevin Senoner y nce la scuadra cuecena à fat trëi goi, che fova de Erik Kantioler, Mike Andriolo y Niklas Piccolruaz. Do chësc resultat a pèr iel mo unì trat i penalties y monce chisc ie jic ora 3:3.
Ala fin dla partida à mo uni mut giapà n crafon che ie unì dat ca dala cunditeria Mussner de Sëlva y n té bon ciaut che Barbara ova njenià ca per duc. Sambën ne manciòvel nia n got de prosecco per i genitores.
L ie stat n blòt danmesdì sibe per i mutons che nce per i genitores y duc i tifosi che ie unic a cialé pro. L se fermova monce chëi che jiva sun Mont Sëuc a cialé, davia che la fuera di ”fans” fova granda.
Speron de vester boni de mëter a jì mo de tel blòta scumenciadives, ulache n se abina per fé chësc bel sport. (va)
