De bela vëntes

Resultac dla scuadres di jëuni dl HC Gherdëina

La Under 10 à n dumënia ai 13 de nuvëmber abù si segondo turnoi y à jugà n cësa contra l Bulsan Foxes Junior vencian per 3:0 (goi de Jonas Piccolruaz, Leo Moroder y Arik Kasslatter), l HC Bulsan Academy perdan per 0:3, l Renon Junior perdan per 1: 5 (gol de Gabriel Turina) y l Persenon Falcons Junior perdan per 0:6.
Coche for pra i turnoies Under 10 messova uni scuadra nce fé n pitl parcour tecnich, ulache l univa tëut ju l tëmp y cumpedà adum duc chëi dla scuadra. Nosc mutons à abù 12 menuc y 15 secunc per de n dut 17 jugadëures y 2  verdiaporta.

U14 Vinschgau - Gherdëina 8:4 (2:1, 4:0, 2:3)
La scuadra dla Under 14 à jugà n dumënia ai 13 de nuvëmber a Prad. La à scialdi sciacà y nce l arbitradëur à judà pea cun straufonghes nia drëtes y n gol che ova perdrët mé tucà l pel, ulache monce i averseres à dit che l ne fova nia jit ite. Tl terzo tëmp à l Gherdëina mo dat dut y l ti ie nce garatà trëi goi, ma purtruep fòvel bele massa tert per tré decà la partida.
Per l Gherdëina à Alexander Vigl fat 2 goi y 1 n gol prun Ben Linder y Tommy Delucca.

U16 Eppan - Gherdëina 4:5 d.p. (3:1, 0:3, 1:0, 0:0, 0:1)
N sada ai 12 de nuvëmber à la scuadra dla Under 16 jugà a Eppan. I mutons se à purvà dassënn y à nce fat l prim gol, ma pona se n ài giapà trëi y nsci ie l prim tëmp finà via per 3:1 per i autri. Tl segondo tëmp àla pona butà a fé trëi goi jan danora per 4:3. Purtruep se ài tl terzo tëmp mo giapà n gol y nsci ài messù jì tl "overtime" y ajache l ne n’ie tumà degun gol fòvel da tré i penalties. Tlo ti àla butà al Gherdëina che à venciù nsci la partida per 5:4. Chësta vënta ti à fat propi bon a duc, bravi mutons! Per l Gherdëina àl fat i goi Tim Linder, Tobias Moroder, Lukas Glück y Nicolas Demetz. L penalty dezijif fova de Markus Mair.

U19 Gherdëina - Eppan 4:2 (1:1, 2:1, 1:0)
Jugà drët bën à la Under 19 n dumënia ai 13 de nuvëmver te Sëlva contra la scuadra dl Eppan. L ie unì jugà bëndebò dur y la partida fova nchin ala fin da tramedoi pertes scialdi cumbatuda. Ala fin ti àla butà al Gherdëina che à venciù per 4:2. Per l Gherdëina àl fat i goi Simon Piccolruaz, Andreas Vinatzer, Kevin Schmalzl y Diego Glück.

SerieC: Gherdëina - Vinschgau 4:2 (2:2, 0:0, 2:0)
La scuadra dla Serie C à jugà n vënderdi n cësa contra la scuadra dl Vinschgau. La partida fova scialdi fair y valiva. Cun mé cater tacajuech se l’ài caveda drët bën y à venciù cun merit per 4:2. Dla prima scuadra iel unit a judé ora che Giancarlo Kostner, Benjamin Bregenzer y Simon Vinatzer. Per l Gherdëina àl fat i goi: Benjamin Bregenzer (2), Gabriel Senoner y Juri Runggaldier.

Proscima partides di jëuni n cësa: Duman sada ai 19.11. dala 12.00 juega la U12 contra l Lana y for duman sada dala 14.00 fej la U16 contra i Diavoli Milano. (im)