La U16 vënc sëch a Milan

Trëi scuadres di jëuni dl HC Gherdëina à jugà ala fin de chëst’ena passeda y se à davanià doi de bela vëntes, ntan che i majeri se l’à ala fin mo trata via

U14 Gherdëina - Vinschgau 5:4 (1:2, 2:2, 2:0)
N dumënia 25 de setëmber à la Under 14 jugà n cësa contra l Vinschgau. I mutons à jugà scialdi bën chësta partida cumbatuda nchin ala fin. La scuadra de Gherdëina à trat zirca caranta iedesc sun cassa y à pià su n 20 tiri plu n penalty y nce sce i fova de n gol dovia l’ài mpo mo trata decà, vencian cun merit per 5 a 4. Per l Gherdëina àl fat i goi: Leo Messner (3), Ben Linder y Andrej Kostner.

U16 Milano - Gherdëina 1:13 (0:7, 0:1, 1:5)
N sada 24 de setëmber ie la Under 16 furneda a Sesto S. Giovanni y davia che l ie dalonc assé fova i mutons scialdi mutivei a purté a cësa i doi ponc, y chël ti ie nce garatà. Sambën iel suvënz scialdi plu rie a jughé contra scuadres dëibles, dut l sistem ne va nia coche n ulëssa y n muessa se nventé na maniera de jughé nia propi bela da cialé pro. La scuadra aversera, stentan a fé l juech, à purvà a jì sun l mandl, dantaldut sun i pitli dl Gherdëina, ma chëi ti à tenì permez y ne se à nia lascià mëter sot. Na bona partida venciuda saurì per 13 a 1. Per l Gherdëina àl fat 2 goi prun: Tobias Moroder, Leo Messner, Tim Linder, Kevin Schmalzl y Nicolas Demetz, y un n gol prun Julian Senoner, Lukas Glück y Marc Frisch.

U19 Gherdëina - Fascia 2:3 (0:0, 1:1, 1:2)
Nia drë butà ne ti àla ala Under 19 n dumënia ai 25 de setëmber n cësa contra l Fascia. La doi scuadres fova valives y l Gherdëina fova monce 2 a 1 danora, la ucajions da gol fova tlo ma la à sciacà a i abiné ite ntan che l averser à 6 menuc dan la fin mo fat l gol dla vënta. Per l Gherdëina à Andreas Vinatzer y Florian Moroder fat i goi.

Proscima partides di jëuni n cësa:
duman sada ai 1.10. dala 14.00 fej la U16 contra l Aosta. (im)