L campiunat di jëuni à scumencià!

(im) - Pra la U16 y U19 iel nce mesun de mëter ite jugadëures n ann plu vedli, "overage" coche n dij per nglëisc. Karl Mussner à bele da mei incà njenià ca fisicamënter sciche l toca chisc mutons cun trainings a sut y de lugio àn scumencià a jì sun dlacia. Di trainadëures de hockey iel unì cunfermà Marcel Skokan, che fej bele la terza sajon pra l Gherdëina, leprò iel unit si pere Jozef Skokan che à na gran esperienza cun i jëuni, ël ie l fundadëur dla scola de hockey te si luech a Poprad tla Slovachia. Chisc doi trainadëures slovacs mëina dut l setor di jëuni y vën judei sambën nce da trainadëures da tlo coche Vito Delucca, Christian Piccolruaz, Derek Eastman y Marco Senoner. Ti mbincion a duta la scuadres dl Gherdëina n bel campiunat "fair" y nteressant.

Per n valguna scuadres àla coche dit bele scumencià y à ala fin dl’ena passeda nce bele fat si prima partides de campiunat.

U12: la Under 12 à jugà n sada 17 de setëmber si prim miniturnoi a Persenon contra la scuadres dl Renon y l Persenon. Purtruep ne ti àla nia drë butà nce sce i mutons se à purvà dassënn y à perdù tramedoi partides per 0:9.

U14 Sterzing - Gherdëina 7:2 (1:0, 2:2, 4:0)
Nia drë butà ne ti àla ala scuadra dla Under 14 tla prima partida de campiunat a Sterzing. I jugadëures averseres fova duc scialdi majeri che chëi dl Gherdëina. I mutons dl HCG à cumbatù y se à purvà, ma i à perdù per 2:7. Per l Gherdëina à Leo Messner fat tramedoi i goi.

U16 Gherdëina - Eppan 3:6 (2:2, 1:3, 0:1)
Na gran mudazion iel chëst ann pra la Under 16, tramedoi verdiaporta dal ann passà ie jic a jughé oradecà y nsci à i respunsabli di jëuni messù jì a crì n verdiaporta, l ie Christian Ascione de Trënt y sambën Manuel Insam dla Under 14 che juega pona te doi campiunac. N sada dl’ena passeda iel stat la prima partida de chësta scuadra. Per na scuadra jëuna coche la Under 16 iel scialdi mpurtant a pudëi jì sun dlacia, se fé truepa esperienza de juech y pudëi purvé ora roba nueva che ti vën nsenieda. Ti mbincion a Christian y duc i mutons na bona sajon. I goi per l Gherdëina ie unic fac da Tobias Moroder, Kevin Schmalzl y Ben Linder.

U19 Gherdëina - Torino 12:0 (1:0, 6:0, 5:0)
N dumënia à la Under 19 jugà si prima partida de campiunat. I mutons à venciù saurì contra n averser plutosc dëibl y che jugova mé cun 12+2 jugadëures. L ie tumà n grumon de goi per l Gherdëina, i fac i à: Diego Glück (3), Samuel Moroder (2), Juri Runggaldier (2), Damian Bergmeister, Florian Moroder, Lukas Mair, Tobias Moroder y Marc Frisch. Proscima partides di jëuni n cësa: n dumënia ai 25.9. dala 14.00 jugherà la U14 contra l Vinschgau y dala 17.00 fajerà la U19 contra l Fascia.