La Under 18 ie te finela

Tla semifinela dl campiunat talian Under 18 fòvel l Gherdëina y l Renon y l Asiago contra l Puster che se batova per ruvé tla finela. L Asiago se à bele do doi partides davanià l post te finela, l Gherdëina à messù jì ala terza partida. Cun doi partides vëntes ai penalties se à ala fin l Gherdëina merità de ruvé inant.

Gherdëina - Renon 2:5 (0:1, 1:1, 1:3)
Scumencià melamënter à per la U18 la lingia de partides per ruvé tla finela. I mutons fova nervëusc y sautova scialdi a uet y ne se nuzan nia l vantaje de jughé n cësa, ntan che i autri fova plu cuncrec y à nuzà la ucajions che i ova. L Gherdëina à bën trat 54 iedesc sun cassa, ma à danz mé fat doi goi! Sun l 2:4 ala fin à l trainadëur mo purvà a tò ora l verdiaporta, ma al Renon ti iel mo garatà l gol a cassa ueta. I goi a fat Tim Linder y Damian Bergmeister.

Renon - Gherdëina 2:3 d.p. (1:1, 0:0, 1:1, 0:0, 0:1)
N la ultima dumënia fòvel pona la segonda partida sun Renon. I mutons à jugà cun mpue plu de cë y fova tresora dan cassa dl averser, che purempò for apront a fermé i tiri dl Gherdëina. Do doi menuc tl terzo tëmp ti iel garatà al Gherdëina l 2:1, ma doi menuc dan la fin dla partida se ài mo giapà l gol che valivova inò ora l resultat. N à nsci messù jì tl "overtime". Iló ne n’iel tumà degun gol y sun na tela àn messù tré i penalties. Cinch per pert che ne à mudà nia y pona jìvela un al iede: scumencià a tré à l Renon y à falà, śën messova tré l Gherdëina y sce l jiva ite fòvela venciuda. Duc stajova ert, ma la ti à butà al Gherdëina y à nsci venciù chësta partida. I doi goi tl tëmp reguler ie unic fac da Andreas Vinatzer, l penalty dezijif fova de Damian Bergmeister.

Gherdëina - Renon 4:3 d.p. (1:2, 1:1, 1:0, 0:0, 1:0)
Partida da zitré dal scumenciamënt nchin ala fin, la "bella" coche n dij, chëla de merdi ai 5 de auril tl stadio de Sëlva. Śën se tratòvela, l fova l’ultima puscibltà per ruvé te finela y i mutons à sambën sentì dassënn chësta partida. Purtruep àla riesc sciacà y mé do trëi menuc y mez stajòvela bele 2:0 per l Renon. Ma l Gherdëina ne l’à mei data su y cumbatan dassënn iesi stai boni de valivé ora la partida nsci che n à inò messù jì tl "overtime" y pona a tré i penalties. Tlo ti àla bel snel butà al Gherdëina a fé i goi, ntan che l Renon ne n abinova ite degun. Per l Gherdëina àl fat i goi Lukas Mair, Juri Runggaldier y Damian Bergmeister. L penalty dezijif fova de Leo Holzknecht.

Nsci ie l Gherdëina śën te finela ulache i à da se la fé ora cun l Asiago. La prima partida ie bele n juebia ai 7 de auril dala 18.30 te Sëlva, la segonda sarà n sada ai 9 de auril a Asiago y sce n cajo saràl mo da fé la terza partida n lunesc te Sëlva. Unide duc a fé n bel tifo!

Y propi ai tifosi ti vàl n gran rengraziamënt, l miëur "Fanclub", belau dut jugadëures dla Under 20 y plu jëuni che à ciantà y sustenì la scuadra ntan duta trëi la partides, braviscimi!!! y speron de Ve udëi inò.