La vënta fossa stata ala jonta

Chëst’ena ti àla inò tucà ai plu jëuni dl hockey y śën do n valgun mënsc àn pudù udëi che i à fat de gran vares inant.

La Under 10 à n sada ai 30 de jené fat na partida a Persenon contra l HC Brixen Falcons. I à purtruep inò perdù, ma nia plu tan sëch, per 1:4. Per l Gherdëina à Erik Kantioler fat l gol.

La Under 12 à fat si turnoi chëst iede te Sëlva, n dumënia ai 31 de jené. Do la bela vënta dl turnoi a Kaltern à nosc mutons mo n iede desmustrà n bel hockey, vencian zënza pierder na partida l turnoi n cësa. Bravi a duc, medrë inant nsci! Chisc i resultac dla partides: Kaltern - Gherdëina 0:1, Gherdëina - Kaltern 2:1, Vinschgau - Gherdëina 1:1, Gherdëina - Vinschgau 1:0. Per l Gherdëina àl fat i goi: Ben Linder, Nicolas Hofer, Tommy Delucca, Lukas Ausserhofer y Ruben Prinoth.

U18 Chiavenna - Gherdëina 2:9 (1:3, 0:4, 1:2)
Na partida da desmincë fova chëla dl’ultima sada a Chiavenna. Ma nia coche prestazion da pert di jugadëures, ajache i à jugà bën y venciù saurì, ma l fova da vester grams che i se feje mel per l cumpurtamënt nia sportif di averseres y l stlet lëur di arbitradëures che ne ova nia plu la partida tla man. L trainadëur y l respunsabl dl Gherdëina à fat dla dutes per chieté ju i mutons y nsci àn mo finà via ne ti jan nia plu permez a chëi dl Chiavenna. Per l HCG àl fat i goi: Juri Runggaldier (3), Damian Bergmeister y Leo Holzknecht (2), Lukas Mair y Andreas Vinatzer (1).

U20 Gherdëina - Sterzing 4:6 (1:1, 1:3, 2:2)
N dumënia à la Under 20 jugà n cësa contra l Sterzing. Sciot per chësta partida che fossa zënzauter stata da vëncer, ma purtruep àla mpue sciacà y i goi ne ulova nia jì ite tla cassa dl averser. N doi menuc dan la fin canche la stajova 3:5 y i nosc drucova dassënn, à l trainadëur mo purvà a tò ora l verdiaporta, ma l Sterzing à fat l sesto gol a cassa ueta. Tosc lessù ti iel al Gherdëina mo garatà l cuarto gol, ma l ti restova mé plu un n menut per fé doi goi y pudëi jì nsci tl ”overtime”. La ne à nia plu ulù vester y nsci ài perdù per 4:6. Per l Gherdëina àl fat i goi: Christian Thaler, Diego Glück, Juri Runggaldier y Peter Mulser.

Proscima partides di jëuni n cësa:
La U10 juega duman sada ai 6.2. dala 14.30 contra l Auer/Neumarkt y la U16 juega n dumënia ai 7.2. dala 11.00 contra l Pieve.