Trat decà la partida

U10 Gherdëina - Bulsan Academy 1:8
La Under 10 à jugà n sada n cësa contra l Bulsan Academy. L Gherdëina ova nce n valgun jugadëures dla Under 8. Purtruep ài perdù chësta partida per 1:8. L gol per l Gherdëina ie unì fat da Matteo Senoner.

U12 Turnoi a Kaltern
N turnoi cun auc y basc iel stat n dumënia ai 17 de jené a Kaltern per i juagadëures dla Under 12. I mutons à jugà scialdi bën, ma unitant fajovi nce vel’ gran fal. Purempò ài dat dut y venciù cun merit l turnoi. La scuadra ruva śën tl drë mumënt n forma, bravi a duc! La partides ie jites ora nsci: Kaltern-Gherdëina 0:2; Gherdëina-Kaltern 2:3; Vinschgau-Gherdëina 0:1; Gherdëina-Vinschgau 2:1. Per l Gherdëina àl fat i goi Ben Linder, Matthias Perathoner, Marc Kasslatter, Lukas Ausserhofer, Nicolas Hofer, Davide Macaluso y Marvin Kasslatter.

U14 Kaltern - Gherdëina 3:8 (2:2, 0:2, 1:4)
Na bela vënta a purtà a cësa la Under 14 n sada ai 16 de jené. I mutons à jugà scialdi bën, se à purvà nchin ala fin y se à merità deplën chësta vënta. Na gran legrëza ova dantaldut Leo Rabanser che à fat si prim gol. Per l Gherdëina àl fat i goi Markus Mair (4), Leo Rabanser, Tobias Fill, Julian Senoner y Tobias Moroder.

U16 Pieve - Gherdëina 5:2 (2:2, 2:0, 1:0)
N dumënia 17 de jené à la Under 16 jugà a Pieve y riesc àla butà a jì danora de n gol. I mutons à tl prim tëmp cumbatù y tenì pea drët bën y nsci stlut ju l tëmp sun l 2:2. Tl segondo tëmp ne àla nia plu drë butà y do che n jugadëur dl Gherdëina à giapà doi plus diesc menuc de straufonga ie l moral dla scuadra jita dojù y i mutons ne n’à plu ndrezà ora nia. Diesc menuc alalongia ne fova l Gherdëina nia plu bon de jì ora de si pert dl ciamp dala dlacia. L Pieve à cumbatù mpue deplù y ie stat bon de vëncer la partida per 5 a 2. La va de jì plu cun i jadins, de jughé plu deberieda y cumbater sambën deplù. Per l Gherdëina àl fat i goi Tim Linder y Anton Perathoner.

U18 Gherdëina - Fascia 8:5 (0:3, 6:1, 2:1)
Cumplet durmì via l prim tëmp se à la scuadra dla Under 18 n sada ai 16 de jené. I mutons à cialà pro mpede jughé y nsci ti iel garatà al Fascia 3 goi bele tl prim tëmp. Do la craunia da pert dl trainadëur dl Gherdëina Marcel Skokan à i mutons tl segondo tëmp dat dut y cumbatù ti fajan bën 6 goi ai averseres. Tl terzo tëmp iel pona stat l Fascia a fé inò gol y la stajova 6:5, sun na tla pudòvela mo unì bëndebò ciauda, ma per fertuna à l Gherdëina mo fat doi goi y venciù chësta partida scialdi nteressanta nce per chëi che ie unic a cialé pro. Per l Gherdëina àl fat i goi Damian Bergmeister (3), Lukas Mair (2), Juri Runggaldier, Florian Moroder y Bean Schmalzl.

U20 Gherdëina - Pergine 0:4 (0:2, 0:1, 0:1)
Bën la plu stleta partida de chësc campiunat à fat la Under 20 n mierculdi ai 13 de jené te Sëlva contra l Pergine. I mutons ne à nia jugà cun legrëza y ne à nia cumbatù nce sce l averser fossa dessegur stat da bater. Sciot per chësta partida trata via.

U20 Gherdëina - Valpellice 5:2 (1:1, 2:1, 2:0)
Bele scialdi miec iela jita n dumënia ai 17 de jené contra l Valpellice. I mutons à desmustrà ueia y mpëni y ne se à nia lascià pruvoché plu che n tant dala truepa azions falëuses di averseres. L ie tumà truep menuc de straufonga, ma l Gherdëina ne se à nia plu lascià tò chësta vënta y à mo fat l cuinto gol a cassa ueta canche i autri à tëut ora l verdiaporta. Bravi mutons inant nscila! Per l Gherdëina àl fat 2 goi prun Damian Bergmeister y Patrick Nocker y un n gol Samuel Moroder.