Venciù duta la partides

La Under 10 ova n sada ai 12 de dezëmber n turnoi a Persenon cun cater d’autra scuadres: Gherdëina, Renon, Bulsan Academy blue, Bulsan Academy white y sambën l Persenon. L Bulsan junior ova liede. I mutons à coche for fat cater partides y n ”parcour” y à venciù la partida contra l Academy white per 1:0. Cun l Renon ài perdù 1:8, cun l Academy blue 1:2 y cun l Persenon 0:1. I trëi goi per l Gherdëina ie unii fai da Niklas Piccolruaz (2) y Matteo Senoner.

U14 Gherdëina - Puster 4:0 (2:0, 2:0, 0:0)
Venciù saurì, nce sce nia jugà drë' bën, à la Under 14 n sada ai 12.12. te Sëlva contra la scuadra dl Puster. Suvënz iela nsci che canche n juega contra scuadres mpue plu dëibles iel plu rie fé n bel juech che no cun de bones. Ma i à venciù a nul; n bel "shut out" per i verdiaporta.
Per l Gherdëina àl fat i goi Philipp Demetz, Tobias Fill, Tobias Moroder y Markus Mair.

U16 Gherdëina - Fiemme 8:5 (3:1, 2:3, 3:1)
La partida dla Under 16 de n dumënia 13.12. te Sëlva contra la scuadra dla Val de Flëm à scumencià drët bën per l Gherdëina y i prim trëi goi ie tumei ti prim 11 menuc de juech. Tl segondo tëmp fova la partida scialdi cumbatuda cun truep menuc de straufonga da tramedoi pertes y n resultat per l Nuova Fiemme 97 de 2:3. Ntan la pausa ti à i doi trainadëures rujenà ite dassënn y dat curaje ai mutons che à pona nce juà. L terzo tëmp ie nsci jit ora 3:1 per l Gherdëina; i mutons à mustrà duta si pascion de fé hockey cun de bela azions de jughé deberieda.
La scuadra dla Under 16 ie scialdi jëuna, ma la à bele mparà truep ntan chësta sajon. L Gherdëina à mo doi partides da fé dan che l scumëncia la segonda pert.
Per l Gherdëina àl fat i goi: Tobias Fill (3), Kevin Schmalzl (2), Tim Linder, Marc Frisch y Tobias Moroder.

U18 Gherdëina - Pieve 6:4 (0:1, 2:2, 4:1)
Contro la scuadra plu sterscia dl campiunat Under 18, deberieda cun l Puster, à i mutons dl Gherdëina n sada 12.12. mustrà che i sà da cumbater y da se purvé nchin ala fin. Do che i fova tl 10jim menut dl segondo tëmp 1:3 dovia ti à i mutons dl Gherdëina dat dut cie che i fova boni y à tl terzo tëmp mo sapù da se fé valëi ti fajan 4 goi ai averseres, l ultimo a cassa ueta do che l Pieve à tëut ora l verdiaporta. Bravi!
Per l Gherdëina àl fat i goi: Andreas Vinatzer (3), Damian Bergmeister (2) y Marc Frisch.

Proscima partides di jëuni n cësa:
N mierculdi ai 23.12. dala 16.45 jugherà la U16 contra l Valpellice. N sada  ai 26.12. dala 17.30 fajerà la U18 contra l Eppan.