Bela vënta per la Under 20 contra l Cortina

I pitli dla Under 10 ova n sada ai 28 de nuvëmber da jì sun l Renon a fé pea pra n turnoi. Ëi à jugà contra la scuadres dl Renon, Bulsan Academy blue, Bulsan Junior y l Persenon. L Academy white ova liede. I mutons dl HC Gherdëina à inò fat cater partides y n parcour y à venciù la partida contra l Bulsan Junior per 4:1. De ndut à la scuadra dl Gherdëina fat cin' goi: Aaron Oberbacher, Niklas Piccolruaz, Jonas Piccolruaz, Erik Kantioler y Christian Bernardi.

U14 Bulsan - Gherdëina 1:23 (0:9, 0:7, 1:7)
Pra chësta partida de n sada 28.11. a Bulsan tléchel cialé al resultat. La Under 14 à stravenciù, nsci ti à i mutons ulgà al trainadëur Kevin Senoner che ti ova bele dit dant che i muessa ti n fé almanco 20 goi y nsci iela nce stata. Bën 23 goi ie tumei n chël di che l ne fova nianca plu lerch sun la zedula, ulache l à mé lerch 21 goi!!! Bravi mutons!
Per l Gherdëina àl fat 5 goi prun Tobias Moroder y Markus Mair, 4 goi Leo Messner, 3 goi Philipp Demetz, 2 goi prun Giordan Insam y Nicolas Paratoni y un n gol prun à fat Tobias Fill y Ben Linder.

U16 Gherdëina - Pinerolo 2:3 (1:0, 0:2, 1:1)
N dumënia ai 29 de nuvëmber à la Under 16 jugà n cësa contra l Pinerolo. I mutons à tenì pea drët bën y la partida fova for valiva, nce sce i averseres fova fisicamënter majeri y plu gherc. Dantaldut i mëndri à jugà scialdi bën, purempò ne àla nia butà y puech dan la fin dla partida se à l Gherdëina mo giapà l terzo gol.
Per l Gherdëina àl fat i goi Fabian Kasslatter y Markus Mair.

U18 Maran - Gherdëina 3:2 (0:0, 1:1, 2:1)
Na partida da desmincë y chël debota fova chëla dla Under 18 n sada a Maran. L juech plu stlet dal scumenciamënt dla sajon. I mutons se l’à tëuta massa ala lesiera, minan che i vencëssa saurì contra l Maran, che ne n’ie nia iust la miëura scuadra. Ma la ie jita autramënter, i mutons à jugà uniun mé per si cont y ne n’à nia tenì adum y cumbatù per ti vester ai averseres. Nsci ài purtruep perdù per 2:3. Per l Gherdëina àl fat i goi Nicolas Demetz y Juri Runggaldier.

U20 Gherdëina - Cortina 10:4 (1:0, 4:3, 5:1)
Na bela sudesfazion se à tëut la Under 20 n dumënia te Sëlva contra la scuadra dl Cortina. Lavia a Cortina ovi mo perdù 1:2, ma chëst iede se ài mustrà na bela scuadra che tën adum y che sà da jughé n bel hockey. Ala fin ai venciù per 10:4. bravi mutons!
Per l Gherdëina àl fat i goi Samuel Moroder (2), Patrick Major, Christian Mussner, Miran Holzknecht, Leo Holzknecht, Florian Moroder, Lukas Mair, Jean Marc Moling y Damian Bergmeister.

La proscima partides di jëuni n cësa:
Sada ai 5.12. dala 17.00 jugherà la U18 contra la scuadra de Asiago. (im)