22/02/2012

Tl derby ladin vënc l HCG

Bravi mutons. Ala fin dl turnoi à i mutons mo giapà d’uni sort de bona roba da maië y da pestlé.

Under 14: Prima piersa tla cualificazion per i campiunac talians. Do n bon scumenciamënt se à ala fin dl prim tëmp un n jugadëur giapà na drëta paca, nsci da messëi lascé la dlacia y i mutons à messù jughé inant cun n jugadëur de manco sun dlacia, cossa che i à purtei mpue ora dl ritm. I se à giapà n valgun goi y do l segondo tëmp stajòvela 6:3 per l Renon. I mutons à pona tl terzo tëmp mo mustrà na bona partida, ruvan su al 5:6. N à mo purvà a tò ora l verdiaporta l baratan ora cun n jugadëur deplù sun dlacia, ma pra n valguni se fajòvel sentì la stanchëza dla gran partida jugheda l di dant cun la U16 y l ne n’ie plu stat nia da n fé y i à purtruep perdù per 5:6 cun i tëmps jic ora 2:2, 1:4, 2:0.

Ala Under 16 ti àla drët butà, fajan na bela partida cumbatuda nchin ala fin contra l Fascia, che l Gherdëina à venciù cun merit per 6:3 cun i tëmps jic ora 1:1, 4:1, 1:1. Chësta scuadra à na partida ncuei vënderdi, 24 de fauré, dala 16.30, tl stadio Pranives de Sëlva contra l Alleghe.

La Under 18 ova doi partides chëst’ena. Ai 16 de fauré à chisc mutons jugà n cësa contra la scuadra dl Bulsan. I à venciù saurì contra averseres scialdi dëibli per 9:0 cun i tëmps jic ora 1:0, 4:0, 4:0. Nce n dumënia a Pergine ti àla drët butà ala U18. Nce sce l ie unì sciblà true’ massa menuc da n arbitradëur defin nia al’autëza à l Gherdëina venciù saurì la partida per 9:3 cun i tëmps jic ora 4:2, 1:1, 4:0. N juebia ai 23 de fauré à chësta scuadra mo jugà n cësa contra l Alleghe, che ie te tlassifica de un n plazamënt dan l Gherdëina.

La Under 20 dl Sterzing/Gherdëina à jugà n mierculdi dl’ena passeda contra l Maran. Scumencià ne n’ài nia massa cun druch, ma i ie mpo stac boni de no lascé unì massa periculëusc i patrons de cësa. Tl segondo tëmp iesi pona finalmënter stac boni de tò sciche l toca l juech tla man nsci che tl terzo tëmp ài pudù cialé de tenì l resultat, vencian ala fin do la rata saurì per 0:7 cun i tëmps jic ora 0:1, 0:4 y 0:2. N lunesc ai 20 de fauré fòvel tl stadio Pranives de Sëlva la partida cun l Renon sun l program. Iló fòvel danz plu da sté su cun la urëdles, ajache la pudova se traté dl terzo post te tlassifica. Bel riesc iesi jic sun dlacia jugan cun na gran determinazion y pudan chëst iede nce fé cont cun vel’ jugadëur dla majera scuadra. Do puec menuc iesi bele stac boni de fé l prim gol y aprufitan pona doi iedesc ndolauter de avëi n uem deplù sun dlacia, iesi piei danora ruvan ala fin dl prim tëmp al resultat de 5:0. Nce tl segondo tëmp ne n’ie l Renon nia stat bon de se mustré da chëla pert che n l cunesciova y l Sterzing/Gherdëina à abù ucajion de ngrandì mo deplù la defrënza de goi, vencian ala fin per 10 a 2 cun i tëmps jic ora 5:0, 2:1, 3:1. N mierculdi ie i jëuni dl Sterzing/Gherdëina mo furnei a Torino a fé si partida y duman sada arài mo da fé a Sterzing contra l Milan.