15/02/2012

La Under 14 vënc for inò

La Under 10 ova chëst’ena doi partides. N mierculdi ai 8 de fauré iesi furnei a Corvara per fé si partida de campiunat contra l’Alta Badia. I mutons à, cun n frëit mat, jugà drët bën y se à fat saurì contra na scuadra plutosc dëibla. I à venciù per 9:1 cun i tëmps jic ora 4:0, 4:0, 1:1. L’autra partida fova n dumënia ai 12 de fauré te Sëlva contra l Puster. I mutons à fat na boniscima partida, ie sautei y à cumbatù. Tl terzo tëmp se l’ài pona purtruep mpue durmida via y canche l ie unì baratà ora i jugadëures per l ultim iede se ài mo giapà l gol che à valivà ora l resultat. La partida ie nsci fineda via a pèr per 2:2 cun i tëmps jic ora 0:0, 1:0, 1:2.

La Under 12 à jugà n sada ai 11 de fauré tla Sill contra la scuadra dl EV Bulsan. La scuadra de Gherdëina ova la sëuravënta, i à jugà bën mustran n bel juech de scuadra. Nce i arbitradëures à lascià jì la partida zënza sciblé uni cuntrast. Tl terzo tëmp ài mpue lascià do, ma mpo ài venciù saurì per 6:2 cun i tëmps jic ora 3:0, 3:0, 0:2.

La scuadra Under 14 ova n sada na partida nia saurida a Kaltern. L Kaltern giapa for scialdi puec goi y ie for rie da bater. I averseres à scumencià cun n juech mpue dur y chësc à purtà i nosc mpue ora dl ritm. Tl segondo tëmp ëssa l Gherdëina pudù stlù la partida cun n valguna ”chances” da gol. Ma coche la ie tl hockey, sce n ne fej nia i goi pona i giàpen y l Kaltern à bel riesc tl scumenciamënt dl terzo tëmp fat l 3:3 y la ie sambën mo unida bëndebò ciauda. Cun mpue de fertuna – i averseres à dessegur jugà miec tl terzo tëmp – àla butà a fé l cuarto gol y nsci à l Gherdëina venciù la partida per 4:3 cun i tëmps jic ora 0:1, 3:1, 1:1. La U14 arà si proscima partida n dumënia ai 19 de fauré dala 17.30 te Sëlva contra la scuadra dl Renon.

Per la Under 16 dl Gherdëina ne n’iel stat nia da n fé contra la scuadra dl Renon n mierculdi ai 8 de fauré. Tl segondo tëmp ài mpue tenì pea, i à fat n gol y se n à giapà mé un. Tl terzo tëmp ne jiva plu nia y i à perdù sëch per 1:11 cun i tëmps jic ora 0:4, 1:1, 0:6. La scuadra dla U16 arà si proscima partida duman sada ai 18 de fauré te Sëlva dala 14.30 contra la scuadra dl Fascia.

La Under 18 y la Under 20 ne n’à nia jugà chëst’ena passeda. La Under 18 à fat si partida n juebia ai 16 de fauré n cësa te Sëlva, dala 17.30, contra l Bulsan, ulache l fej pea nce doi mutons che jugova l ann passà mo pra l Gherdëina y che ie per gaujes de scola jic a jughé pra l Bulsan.

La Under 20 dl Sterzing/Gherdëina à jugà n mierculdi contra l Maran y arà pona n lunesc ai 20 de fauré na partida, ulache la unirà dessegur bëndebò nteressanta, contra l Renon tl stadio Pranives de Sëlva dala 6 da sëira.