16.12.2011

Vëntes mpurtantes

Cun doi de bela vëntes ruva la Under 18 dl HC Gherdëina, ulache l fej pea nce jugadëures dl Fascia, for plu inant te tlassifica.

La Under 12 (te la foto) à n sada ai 10 de dezëmber fat si partida de campiunat n cësa contra l EV Bulsan. I mutons à cumbatù dassënn per vëncer la partida y la ti ie nce jita fata. I mutons dla U12 de Gherdëina à venciù si prima partida de campiunat per 5:4 cun i tëmps jic ora 2:1, 2:3, 1:0.

La Under 14 ne n’ova ntan l’ena passeda deguna partida de campiunat, ma n valgun atlec de chësta categuria à fat pea cun la scuadra de Südtirol pra l turnoi nternaziunel da Nadel n lecort de Franz Obkircher, che ie unì metù a jì dai 9 ai 11 de dezëmber a Persenon. La scuadres che se à muserà te chësc turnoi fova chëles dl Trentin, dl Venet, dla Lombardia, dl Tirol, dl Bayern y chëla dl Südtirol. Uni scuadra à messù fé contra uniuna y ala fin se à i patrons de cësa tlassificà al bon segondo plazamënt do l Bayern. De Hockey Club Gherdëina àl fat pea Damian Bergmeister (tacajuech), Demetz Jan (pech), Piazza Lukas (verdiaporta) y Vinatzer Andreas (tacajuech).

La Under U18 à slungià la lingia de resultac positifs cun doi vëntes, contra l Alleghe n juebia ai 8.12. per 5:4 y n dumënia 11.12. a Kaltern per 2:0. La Under 18 ie śën tla pert auta tla tlassifica de chësta categuria. Inant jiràla inò n dumënia ai 18 de dezëmber dala 12.00 da mesdì te Sëlva, ulache i arà na partida contra la scuadra de Chiavenna.