23.12.2011

Vënta de marueia per l HC Gherdëina

Per la Under 14 àl n mierculdi ai 14 de dezëmber scumencià la segonda pert dl campiunat, per chëla che l fova da se cualifiché ruvan danter i prims ot de Südtirol. I mutons de chësta scuadra ie furnei n mierculdi dl’ena passeda a Sterzing per jughé contra la scuadra da iló. I ne n’à nia fat na bela partida, jugan uniun mpue per si cont, ma contra na scuadra plutosc dëibla se ài mpo mo fat drët saurì vencian per 7:1 cun i tëmps jic ora 2:1, 3:0, 2:0. N mierculdi ai 21 de dezëmber ài pona jugà n cësa te Sëlva, contra la scuadra de Kaltern, ma davia che la redazion ova bele stlut repurterons tl ann nuef l resultat de chësta partida.

Per i mutons Under 13 iel n dumënia ai 18 de dezëmber nce stat l prim  turnoi di raions, ulache duta la scuadres de Südtirol ie spartides su te cater raions. Gherdëina fej pert deberieda cun Sterzing, Puster y Toblach dl raion nr. 4. Ëi à fat la prima partida contra l raion 3 (Bulsan, Renon, Persenon, Leifers) che ie fineda via a pèr, ma che i à pona perdù ai penalties per 2:1. Dopro ài messù fé contra l raion 2, che ova perdù cun l raion 1 per 3:1. L raion 2 (Eppan, Kaltern, Neumarkt, Auer) ài batù do la rata saurì per 6:1, ruvan nsci terzi te chësc turnoi. Dl Gherdëina fòvel leprò: Leo Holzknecht, Diego Glück, Hannes Kasslatter, Florian Moroder, Jan Moroder, Bean Schmalzl y Mike Windegger.

La Under 18 à jugà n dumënia ai 18.12. n cësa contra l Chiavenna. 8:0 (2:0, 4:0, 2:0) ie l resultat finel de chësta partida contra na scuadra drët dëibla. Te chësta partida à nce abù la ucajion de fé pea i mutons plu jëuni che à nchinamò jugà puech, se desmustran pona nce al’autëza.

Ntant ie nce finei via i Campiunac dl Mond Under 20 tla Polonia, ulache i trëi atlec ladins Gabriel Lang (foto) y Gabriel Vinatzer dl HC Gherdëina y Martin Castlunger dl HC Fascia à jugà pea cun la scuadra naziunela taliana. Arjont ài l terzo post te chisc mundiei de prima divijion grupa B, n plazamënt de unëur nce sce n sperova sucrët de vester boni de fé l saut tla categuria plu auta. Venciù ài trëi partides, contra i favoric dla Franzia ài perdù permò sun la fin iust mé de un n gol y trata via se l’ài mpue cun la Croazia, na scuadra contra chëla che n ëssa perdrët tucà da vëncer.

Chisc ie i resultac plu avisa: ITA - Franzia 1:2, ITA - Iapan 7:2, ITA - Polonia 4:2, ITA - Croazia 1:3, ITA - Kazakhstan 1:0 al overtime. La Franzia se à davanià la promozion tla grupa A ntan che tumà ju ie l Iapan.